Mawkyrwat, Risaw 12 : Ka Meghalaya State Disaster Management Authority (MSDMA), ka District Disaster Management Authority (DDMA), South West Khasi Hills District, ka Revenue & Disaster Management Department jong ka Sorkar Meghalaya ryngkat ka jingïatreilang bad ka National Disaster Management Authority (NDMA), Ministry jong ka Home Affairs ka Sorkar India mynta ka sngi ki la pynlong ïa ka Mock Exercise halor u Jumai bad ka jingtwa khyndew ha baroh kawei ka jylla kynthup ïa ka Mawkyrwat, South West Khasi Hills District.
Ka jingthmu jong kane ka Mock Exercise ka long ban peit thuh ïa ka jingpynkhreh jong ka District Incident Response System bad ruh ban pyni ïa ki rukom treikam bad ki kamram jong baroh ki dkhot kiba hap ha ka Incident Response System (IRS).
Ha kane ka Mock Exercise, da kaba shim nongmuna katkum na ka jingjia khynnuimh jumai kaba ka jingjur ka long 8.7 magnitude ha u Richter Scale kaba la pynlong ruh ba kan don ka jingtwa khyndew, jingkhyllem ki iing ki sem bad ka jingpluh ding. Ha ka por ba pynlong ia kane exercise u Responsible Officer uba long ruh u Deputy Commissioner jong South West Khasi Hills District, Shri. T. Lyngwa, IAS, u la pyntreikam ïa ka District Emergency Operation Centre (DEOC) bad la pynïaid ïa kane ka kam katkum ki kyndon jong ka Incident Response System (IRS), bad la pyntreikam ruh ïa baroh ki section jong ka Incident Response Team kaba kynthup ia ka Operation, Planning bad ka Logistic Section.
Shuh shuh ïa kane ka Mock Exercise la pynlong ha ki 7 jaka kiba don sawdong ba marjan bad ka pdeng jong ka District ha kaba ki jingtwa khyndew, ki jingkhyllem ki ïing bad ki jingpluh ding ki la jingjia ha kiba ki bynta jong ka distrik kiba kynthup ïa ka Mini Secretariat Complex ha Laitlawsang, ka Nativity Higher Secondary School, Mawkyrwat, ka Civil Hospital Mawkyrwat, ka CHC Mawkyrwat, ka Mawkyrwat Market, ka Mawkyrwat locality bad ka surok ha Mawkyllut.
Ïa ka Staging Area ne ka pdeng jong ka jingtreikam la buh ha Mini Secretariat Complex, Laitlawsang kaba long ka jaka pdeng ban pynbeit ïa baroh ki lad ai jingïarap na ka bynta ban phah sha ki jaka kiba shah ktah na kane ka jingkhynñiuh u jumai. Kumjuh ruh ïa ka Incident Command Post, ka Medical Camp, ka Relief Camp, ka Camp Unit, ka Food Unit, bad kiwei de la buh ha phyllaw jong ka Mini Secretariat Complex, Laitlawsang.
Kane ka exercise ba la pynlong mynta ka sngi ka pyni ïa ki rukom ai jingïarap kum ka pyllait ïa ki briew kiba sah kut ha ki ïing ki sem, ha ki skul, ka jingwad bad sei ïa ki briew ba la mynsaw bad kiba la ïap bad ki rukom ai jingsumar kum ka First Aid bad ka jingkit ïa kiba la mynsaw sha ka Medical Camp bad sha Mawkyrwat Civil Hospitals. Ha kane ka Mock Exercise la wan ïa shimbynta da ki tnad treikam jong ka sorkar bad kiwei kiwei de kiba kynthup ïa ka District Officers & Staff, ki Pulit, ki Civil Defence & Home Guards, ki Fire & Emergency Services, ki Health Department, ki NCC, ki Bharat Scouts & Guides, ki Self Help Groups, ki Cyclist bad ki Volunteers.
Hadien ka Mock Exercise la pynlong ïa ka De-briefing Session hapoh ka NIC Conference Room, DC Office, South West Khasi Hills District, ha kaba ka la don ruh ka jingai jingmut na ka liang ki observers jong ka Border Security Force (BSF) ha kaba ïa dei bad ka jingpynlong ïa kane ka Mock Exercise ha Mawkyrwat.
