Nongpoh, Risaw 12: U jumai ba 7.1 magnitude mynta ka sngi u la khie haka thaiñ Nongpoh bala pynlong ruh ïaki bor district ban pynpah da ka sairen khnang ba ki paidbah kin long phikir, bad ha katei ka jingkhynñiuh jumai bun naki jaka kila shah ktah naduh ka ophis u Deputy Commissioner, Civil Hospital Nongpoh, ka skul St. Paul’s HSS, ka Petrol Pump bad kawei ka karkhana ha Bynrihat bala wanrah ruh ka jingmynsaw briew kaba shyrkhei haka State Level Mock Drill bala pynlong da ka Meghalaya State Disaster Management Authority ryngkat ka jingïatreilang bad ka District Disaster Management Authority, Ri-Bhoi District.
Ha katei ka sngi ka jingkhie utei u jumai, naka liang ki bor district, ki pulit naduh ki NDRF, NEPA, Fire bad Emergency Service, Civil Defence bad kiwei kila bunkam ban pynlait im ïaki paidbah kiba sahkut haki building ban ïarap ïaki bad ban rah ruh sha ki jaka sumar lyngba ki ambulance ban ioh ïaki lad jingïarap ba kyrkieh.
Ka thong jong katei ka Mock drill ka long ban ai jinghikai ïaki paidbah kumno ba kin nang ban ïada ïalade haba wan u jumai bad ki jingshah lyngshop haka mei mariang, khamtam ki paidbah ba kim dei ban kulmar jingmut lane lamwir hynrei ban long jai jai bad bud ïaki katkum ki kyndon haba don kino kino ki jingjia ban lait na kino kino ki jingjia ba sngewsih khamtam ban ïarap ruh ïakiba ngat ha katei ka jingjia.
Kumba naka por shaka por la sakhi ruh ba ki paidbah ki ju khih khohreh bad kulmar jingmut haba wan ki jinglynshop jong ka mariang khamtam u jumai da kaba mareh bad lynñiar ruh bad kane ka wanrah pynban ka jingma ïaki paidbah ba bun ba lang, hynrei ba kin long kiba la khreh lypa bad dei ban tip kumno ban pynkhreh haba wan kum kitei ki jingjia, lyngba kum kitei ki jinghikai.
