Jowai, Lber, 06: Ka ophis District Disaster Management Authority, West Jaiñtia Hills District, Jowai ha ryngkat ka ophis u Superintendent of Police, Civil Defence, ka District Medical & Health Officer, Jowai bad ki nongtrei ka Fire Service & Emergency office Jowai, hynnin ka sngi kila pynlong ïa ka prokram ai jinghikai bad ka mock drill ha MCH Hospital Panaliar, Jowai.
U Dari Lyngdoh, District Disaster Management officer, haka jingkren ula ong ka jingpynlong ïa kane ka prokram bad ka Mock drill ka long shi bynta ban pynkhreh shwa ïalade kum ki nongtrei jong ka Emergency bad ki nongtrei jong ka Hospital ba kin tip ban ïada ha kano kano ka por ban wan lynshop jong ki bor mariang.
U Station Officer (SO), ma Anthony Rymbai, uba dei na ka Fire Service and Emergency ula pyni ïa ka lad jingïada ban teh lakam kyrkieh lada don kino kino ki jingpluh ding, katba na ka Civil Defence u ma F. Lamare ula batai shaphang ki lad jingïarap naduh ka rukom pyllait im ïa ki briew bad ki lad jingsumar ïa kiba la mynsaw.
Ki nongtrei kiba wan mihkhmat na ka ophis u Superintendent of Police kila batai shaphang ka lad ban wanrah ïa ka jingshongsuk shongshngaiñ katkum ki kyndon aiñ bad kum juh ki lad ai jingïada ha ka por ba donkam kyrkieh.
Katba ka Dr. Embhah Chullet, Medial Superintendent MCH, kala ong ba kane ka prokram ai jinghikai bad kumjuh ïa ka jinglehkai mock drill kan ïarap shibun eh ïa nongtrei jong kane ka Hospital ban long kiba la pynkhreh lada wan ki bor jong ka mariang ha kano kano ka por.
