Shillong, Lber 14: Ka Tnad ka rep ka riang jong ka sorkar pdeng ka la pynlong ïa ka webinar halor ka phang “Enhancing Access to Institutional Credit through Kisan Credit Cards (KCC)” ha nongbah Shillong. Ha kane ka jingïalang la sakhi ka jingïashim bynta shitrhem ki nongrep bad ki nongtrei bank, kaba long ka sienjam ba kongsan ban pynthikna ka jingïoh ki nongrep ïa ka ram kaba kham biang na ki jaka treikam kiba ïadei bad ka pisa pilaiñ.
Ha kane ka jingïalang la ïashim bynta 45 ngut ki nongrep na artylli ki jaka – 35 ngut ki nongïashim bynta na Shillong bad 10 ngut na Tura. Kine ki nongrep ki la ïoh jingtip ba kongsan ha kaba ïadei bad ka skhim KCC, kaba thmu ban pynïoh ram kaba jem dor ïa ki nongrep na ka bynta ki jingdonkam ba ïadei bad ka rep ka riang, ïarap ïa ki ban pynbiang ïa ki jingdonkam pisa na ka bynta ki jingthung, ka jingthied ïa ki symbai, ki sboh, bad kiwei kiwei ki jingdonkam ba ïadei bad ka kam rep.
Ha kane ka jingïalang la ïadonlang ki nongtrei bank na ki bank bapher bapher, ki Lead District Manager (LDM) na baroh ki distrik, bad u Convener jong ka State Level Bankers’ Committee.
Ka jingïalang ka la long kaba seisoh, ha kaba ki nongïashim bynta ki la pynpaw ka jingsngewnguh na ka bynta ka jingtip ba ki la ïoh bad ka jingsngewthuh kham bha halor kumno ki lah ban ïoh ïa ka ram na ki jaka kiba trei ha ki kam kiba ïadei bad ka pisa pilaiñ. Ban kyntiew ïa ki kam rep jong ki. La khmih lynti ba kane ka sienjam kan long ka jingmyntoi ïa ki nongrep kylleng ka jylla, kyntiew ka jinglah pynmih kham bun ki mar rep bad kyntiew ïa ka kyntiew ïa ka jingshngaiñ jong ki nongrep ha ka ïoh ka kot.
