Khliiehriat Lber 05 : Ka company dewbilat ka Star Cement Ltd, mynta ka sngi ka 5 tarik u lber 2025 ka la pynlong ïa ka prokram ba kyrpang, ka 54th National Safety Day ha kaba la ïa shimbynta ryntih da baroh ki nongtrei jong katei ka company, ïa ka prokram la pynlong ha phyllaw jong ka company Star Cement hi ha Lumshnong, East Jaiñtia Hills District bad ka phang pdeng jong kane ka prokram ka dei “Safety & Well-being Crucial for Viksit Bharat,”, kaba thew sha ka bynta ka bit ka biang kaba lait na ki jingma, jingmynsaw, jingpang jingshitom.
U nong ai ktien uba na Star Cement Lumshnong, u Siddharth Banerjee, uba dei ruh AGM Administration, u la ong ba ka jingpynlong ïa kane ka prokram ka la long kaba jop ha kaba ka company hi ka don ka jingmut ba skhem ban pynlong ïa ka jaka trei kaba lait na ki jingma, jingmynsaw bad ban pynlong ruh kaba bit na ka bynta ka koit ka khiah ha kino kino ki bynta ba ki nongtrei ki trei ïa kino kino ki kam hapoh ka company.
Ka Star Cement, ka la pynlong ïa kane ka prokram ha ka rukom kaba ïar bha, ha kaba ki don bun ki bynta kiba kynthup hapoh kane ka prokram bad ki nongtrei ruh lem bad ki bor pyniaid kiba na ka liang ka management ki la shim ïa ki kyntien jingkular ban long tikna bha bad kiba don ka jingkitkhlieh ha ki kam ba ki trei ban lait na ki jingma bad jingmynsaw lane ka Safety Pledge Ceremony bad ki la pynlong ruh ïa ka jingiaid paidbah da kaba rah ïa ki banner ha ryngkat ki jingpyrta slogan ha baroh kawei ka phyllaw jong ka company ba la pynsawa ïa ka sur ban long kiba shimkhia ïa ki kam ban leh tikhna bha ban lait na kano kano ka jingma, jingmynsaw ha ki kam ba ki trei bad ruh ban long kiba koit ba khiah krat ha ka met ka phad.
Related Posts
La pynlong ruh ïa ki prokram ai jinghikai kum ki workshop ha ki bynta bapher bapher bad ka jingiakren ne jingpynsngew ba ïada bad ki bynta ban long phikir ha ki kam ba ki trei, la ai jinghikai ruh halor kumno ban long kiba la pynkhreh lada jia ba don kino kino ki jingjia kiba donkam ki jingiarap kiba kyrkieh bad ju khot ruh kum ka emergency preparedness, bad kumno ban ai ki jingiada da ki rukom ai jingiarap bapher bapher.
Shuh shuh, la ai ruh ki jingpynshai ban long bunsien kiba adkar haba ñiah kali ne ñiah ïa ki ar shaka khnang ban lait na kano kano ka jingjia ba sngewsih, halor kane ki nongtrei ka Star Cement ki la ïaid ruh sha man ki dong bad ki lad ba don hapoh ka company bad tah ïa ki poster ba don ki jingthoh ki ban pynkynmaw ïa kiba ñiah kali ne ñiah ar shaka ban long kiba adkar ban lait na kiei kiei kiba sniew.
Na ka liang ka company, ka la pynkup burom ruh ïa ki nongtrei kiba la shim khia bad kiba na noh syniang ha kaba pynlong ïa ka jaka trei kaba dap da ka jingsngew shngaiñ ha ka trei ka ktah “Kum ki nongtrei jong ka Star Cement Ltd, ngi ngeit ba kano kano ka kam kaba lait na ki jingma jingmynsaw ka dei namar ka jingdon ka jingkitkhlieh bad kaba kyntiew bad pynneh pynsah ruh ïa ka jingsngew shngaiñ, kane ka jingrakhe ïa kane ka sngi, ka 54th National Safety Day, ka pyn phalang ruh ïa ki jingmut jingpyrkhat ïa ka rukom treikam jong ngi ki nongtrei ba ngi trei ha kata ka jingpyniaid ne ka management kaba ju peit bniah bha ruh ïa ka jingbit jingbiang jong baroh ki nongtrei” ong u Siddharth Banerjee, AGM Administration Star Cement Ltd Lumshnong .