K a samoi jied ïa ki nongmihkhmat sha ka Ïingdorbar Thawaiñ jong ka Khasi Hills Autonomous District Council (KHADC) ka la kut bad ka party kaba la jop bun tam ki MDC ka dei ka VPP kaba dang shu mih pyrthei dang tang kumba lai snem duna bad ka la ïoh ruh ban thaw ïa ka Excecutive Committee khlem da donkam ïa ka jingkyrshan jong kiwei pat ki seng saiñpyrthei.
Ka jingïohlad jong ka VPP ban thaw marwei ïa ka Executive Committee kaba thymmai ka la pynkmen ïa baroh ki paitbah kiba la ai ka jingkyrshan met bad mynsiem da kaba khmih ba kane ka Executive Committee kan synshar da ka lynti kaba beit, kaba khuid bad kaba lait na ka bamsap bampong. Ym lah ban len ruh ba ka thong ba ha khmat jong u nongseng ïa ka VPP u Bah Ardent M. Basaïawmoit party ka dei halor ka nongrim ban ïakhun pyrshah ïa ka bamsap kat haduh ba ka la pynlong ïa ki paitbah ba kin ai ka jingkyrshan ba pura ka elekshon MP bad MDC ha baroh kawei ka rilum Khasi bad Jaiñtia.
Ha ka sngi kaba u Bah Shemborlang Rynjah u la shah jied kum u Chief Executive Member (CEm) hapoh ka Khasi Hills Autonomous District Council (KHADC) u la khlei ïa ki kyntien ban ym ai Trading License shuh sha kiwei pat ki jaidbynriew ki bym dei riewlum ïa ki kam ba ki trai ri trai muluk ki la lah hi ban trei. Kane ka jingkren jong u Bah Shemborlang ka la pynrah skhor jriang ïa ki briew kiba nabar kiba wan knieh ïa ka pliangja jong ki trai ri trai muluk ha kiba bun ki kam.
Hato kane ka jingkren jong u Bah Shemborlang kan urlong shisha neem namar haba peitbad bishar ïa ka jinglong jingman ha ka ïohkam ka ïohjam ha kine ki sngi kiba mynta ka long shisha ki sngi kiba jwat haduh katta katta ïa ki samla trai jylla la ka long ha ka wadkam sorkar ne wat ha kaba seng ïa ki kam ki jam lajong da kaba ieng ha la ki jong ki kjat.
Related Posts
U CEM ula kren ruh ba ka Executive Committee kaba thymmai kan peitngor bad kan ïaleh katba lah ba ka jingthungkam thungjam ka dei ban long da ka lynti kaba khuid bad kaba shai. Kane ka dei kawei ruh ka mat kaba ki paidbah khamtam ki samla kiba dang biang ka rta wadkam ki angnud ïa kane ka EC kaba mynta kan pynurlong ïa ka jingkren kaba la khlei da u CEM ba mynta uba dang shu shimti ïa kane ka kam dang tang khyndiat sngi.
Haba phai sha ki mat kiba kongsan kiba ka Excecutive Committee hapoh ka District Council ki dei ban peit ki don bun bha hynrei ki mat trei kam kiba kham hakhmat bad kiba kongsan ki long kum ka jingpynbha ïa ki ïew ki hat, ban ym ailad ïa ki bar jylla ba kin khaiï laitluid katba mon ha ki jaka kiba hap hapoh u pud u sam jong ka KHADC, ban ym ai jingbit ïa kino kino ki karkhana kiba pynjaboh ïa ka mariang, ka jingdie kyrteng (Benami) da ki trai muluk sha ki bar jylla ba kin seng kino kino ki kam la ka dei ha ka khaï ka pateng, ki karkhana bad ki kam Kontraktor bad kiwei kiwei.
Ha kitei ki mat ba la kdew ym lah ban len ba ki don katto katne ki bynta ha ki jaka kiba long kum ki kad khaiï kiba hap hapoh u pud u sam jong ka District Council, kata ka Borsora, Nongjri, Cherragaon ha South West Khasi Hills bad ka Shallang ha West Khasi Hills bad kine ki dei ki jaka kiba ïa ka khaï ka pateng la bat da ki bar jylla bad haba peit ha kine ki jaka ki trai muluk ki shu shong madan da kaba die duma kyllaiñ, ki shriew, ki jhur, ki phan bad kiwei kiwei ki jingdie khutia katba ha ki ïng dewbilat kiba bun mala la shong kyllaiñ mungor da ki bar jylla. Kane ka dei ka mat kaba jwat bha ban pyrkhat bad kane ka Executive Committee kaba thymmai kaba la synshar marwei da ka VPP kan leh kumno halor kane? Hato u Bah Ardent kum u nongïalam ba rangbahduh jong ka VPP un ai jingmut kumno ïa la ki jong ki MDC jong u? Lada ki MDC jong u ki la lah ban weng noh ïa ki bar jylla na Borsora bad Shallang la hap ban ong ba ki la dei shisha ki khun dap shynrang ka kmie.
Nalor kata lada ka Executive Committee kaba mynta jong ka KHADC ka lah ban pyntreikam da ka aiñ ïa ki katto katne ki dukan ha ïewduh kiba shu pynshah kyrteng ne kiba shu leh Benami ka jin da long ruh kum ka jingmaham ïa ki trai jylla kiba ju mlien ban kam trai ïa ka dukan ba la pynïaid nadong shadong da ki bar jylla haba leit khynra laisen khaii da ki Pulit Enforcement ka District Council.