Shillong, Lber 05: Ka Shillong Lajong FC ka dang bteng ban pynneh ïa ka jingkyrmen ha ka jingïakhun na bynta ka nam lahduh ha ka OC Blue Shillong Premier League 2024 hadien ba ka la pynliem biang sa shi sien ïa ka Rangdajied United da 2-1 kol ha SSA Stadium ha madan First Ground, Polo, ha ka jingïalehkai kaba la long ha ka sngi Balang.
U Samchaphrang Lato (27’) bad u Iohborlang L Lyngkhoi (45’P) ki la pynkhih ïa kine ki ar tylli ki kol ba kongsan na bynta ka Lajong katba u Benny Khriam (85’) u la thep na bynta ka Rangdajied.
Lada ka resol ka long da kumwei lait na ka jingjop ha kane ka sngi kan jin da la aiti bad pynthikna ïa ka khusnam sha ka Mawlai SC kaba lamkhmat ha khlieh duh, hynrei ka Mawlai ka dang lah ban pynthikna ïa ka nam lahduh kaba lai sien lynter jong ka ha ka OC Blue SPL da kaba jop ïa ka jingïakhun kaba bud, ka ban long ha ka 10 tarik u Lber. Kumba ka ïeng mynta, ka Lajong ka la kamai 42 point, da kaba duna 2 hadien ka Mawlai. Ka Rangdajied ka wan ha ka kyrdan ba lai da kaba kamai 32 point.
Ka kol kaba nyngkong ka la wan lyngba ka bol pashat kaba thikna na liang kamon da u Rimankhraw Kharumnuid. U Deibormame Tongper u la pyrshang ban thep da ka khlieh hynrei ka jingpyrshang ka long kaba jem hynrei donbok ïa ka Lajong, ka bol kaba la wanpoi ha u Samchaphrang uba la pyndep ïa ka kamram ban thep bad buh hakhmat ïa ka kynhun.
Shuwa ban kut ka kylla step, khlem da pyrkhat bha u Aibiangmame Nongneng u la aiti ïa ka bol sha u Deibor uba la mareh ryngkat bad ka bol hapoh phyllaw kol. Khlem da don paralok ban ïarapm lem, u rangap kol ka Rangdajied, u Kerichard L Marshillong u la mih shakhmat bad pynur ïa utei u rangïalehkai ka Lajong, kaba la ïalam sha ka penalty. U Iohborlang u la pynkhih jlang ïa kane ka kabu khlem da pynsepei.
Kaba kham pher na ka bynta ki kynhun ha ka SPL ka long ba ka Rangdajied ka la shah thep bun kol ha ka kylla step ban ïa ka kylla miet- 8 la 3 – kynthup ïa san tylli ha ki lai tylli ki jingïalehkai ba la dep.
Ka Rangdajied ka la ïoh la ka jong ki kabu ha ka kylla miet, ha kaba u Owanijuh Pajuh u la ïoh ban pyndei tiak da ka khlieh ïa ka bol hynrei ka la leit beit beit sha u rangap kol ka Lajong u Siwel Rymbai. Ka RUFC ka la ïoh ban pynma lai sien na ka corner kick hadien habud, ha kaba ar tylli ki jingpyrshang la shah khanglad bad kaba lai la pynsyrwa kai sharud da u Aenam Jyrwa.
Dei lyngba u Benny Khriam, uba la mih bujli ha ka kylla miet uba la ïoh ban pynphai shi kol na bynta ka Rangdajied. U Ieitlang Syiemlieh u la jan ïoh ban pynïakhaid hadien ar minit hynrei kane kam shym la urlong bad ka Lajong ka la ïoh ban khur ïa ka jingjop, kaba, da kajuh ka kol, ba ka la pynliem ïa ka Rangdajied ha ka jingïalehkai ba nyngkong ha u Risaw.
Ka jingïalehkai mynta ka sngi kan long hapdeng ka Ryntih FC pyrshah ïa ka Nongrim Hills SC ha ka por 3 baje nohphai sngi. Kane kan dei ka jingïalehkai ba khatduh na bynta baroh arliang ki kynhun. Lada jop ne ïakhaid kan kyntiew ïa ka Nongrim Hills na ka kyrdan ba phra sha ka kyrdan ba hynñiew ha ka miej. Ka Nongrim Hills ka la jop ïa ka 1st leg pyrshah ïa ka Ryntih da 6-0 kol ha u Nohprah.
