Ha kine ki 3 snem ban wan, 1,900 klur yn pynlut ka Sorkar ban kyntiew ïa ka kam ïalehkai : Conrad

Shillong, Lber 05: Ha ka jingïalang jong ka kynhun Myntri ha ka ïing dorbar kaba la long ha ka sngi Balang, u Myntri Rangbah jong ka Jylla Meghalaya, u Conrad K Sangma, u la pynbna ba ha kine ki lai snem ban wan ka Sorkar ka thmu ba kan pynlut ym duna ïa ka 1,900 klur na bynta ka kam ïalehkai bad kane kan kynthup lang ruh ïa ka jingpynlut ha kaba ïadei bad ka jingpynkhreh ïa ka National Games kaba 39, kaba ka Jylla kan sa ïoh ban pynlong.

Haba wanrah ïa kaneka mang tyngka u Myntri Rangbah ka Jylla u la kam ba naduh u snem 2018, kumba 1,500 Crore na ka pla tyngka jong ka jylla la pyndonkam ha ka ban tei ïa ki madan bad ki jaka ïalehkai haba ïanujor ïa ka 100 klur naduh snem 2001-18.

U la bynrap, “Naduh ba la thaw ïa ka jylla, ym pat don kano kano ka sorkar ha kano kano ka por kaba la pynshlur ïa ki kam ïalehkai kum ka jong Ngi. Nga ngeit ba ka jingïalehkai ka dei ka lad ban lam lynti ïa ki samla jong Ngi sha ka lawei kaba bha.”

U la pynkynmaw ruh ba ka Jylla ka la ïoh ban pynlong ym duna ïa 10 tylli ki lympung ïalehkai kiba heh la ka long ha ka kyrdan National ne international, kum ka Indian Super League, ka Durand Cup, ka Elite Men’s Boxing Championship, bad ka International Canoe Federation World Cup qualifiers for India.

Nalor katta u Conrad um lah ruh ban khlem da pynpaw ïa ka jingsngew sarong ba ka Jylla ka la ïoh ban khur ïa san tylli ki takma ha ka 38th National Games kaba dang shu dep ha Uttarakhand, kiba la khur baroh na ka jingïakop kieng lieng.

“Nga sngew kmen ba ka 39th National Games kan sa long ha Meghalaya ha u snem 2027. Wat hapdeng ka jingïatan tyllai kaba jur na ki jylla kiba kham heh kum ka Chhattisgarh bad Assam, ka jingaiti bad jingpynkhreh jong ka jylla jong Ngi ka la long ka bynta kaba khraw ba ngin ïoh ïa ka rai ban pynlong,” la ong u Myntri Rangbah ka jylla. “Kane ka dei shisha ka por ban lehkmen bad pynskhem biang ïa ka jingaiti jong Ngi ban kyntiew ïa ka Sports.”

Ki jingtei ïa ki jingtei ha kaba ïadei bad ki kam ialehkai kin long ka bynta kaba heh tam jong ka jingpynlut kaba la thmu kaba long T.1,900 klur ha kine ki lai snem ban wan. Kane la kynthup lang ïa ka jingthmu ban tei ïa ka Mawkhanu Football Complex kaba shongdor haduh 732 klur tyngka, ka madan ïalehkai phutbol kaba lah ban ngiam 40,000 ngut ki nongpeitkai, kaba yn sdang ban shna ha u snem ban wan. “Kane ka madan kan long ka pdeng jong ka jingangnud jong ka Meghalaya ban long ka ‘Nongbah jong ka phutbol jong ka ri India’,” ong u Sangma.

Kiwei pat ki projek ki long 25 tylli ki madan ïalehkai ban siang da u phlang plastik, 140 tylli ki grassroots centre jong ki klob shnong. Ka CM’s Football Mission, kaba la sdang dang shen, kan pynlah ïa kine ki jingthmu, u la bynrap, da kaba mang tyngka T.10 klur na ka bynta kane ka jingthmu.

Ki projek kiba heh kiba dang ïaid shakhmat, kum ka jingpynthymmai ïa ka JN Stadium ha Shillong, ka jingshna ïa ka PA Sangma Sports Complex ha Tura, ka madan Ampati bad ka Jongksha Indoor Stadium yn sa pyndep noh shen, la kular u CM.