Shillong, Lber 05: Ka Nongthymmai scc ka la la khur ïa ka jingjop da kaba pynliem da 5 wiket ïa ka Malki CC ha kawei na ki jingïalehkai jong ka lympung Shillong Cricket League First Division 2024-25 kaba la long hynne ka sngi Balang ha madan Polo.
Hadien ba jop ïa ka jingkynting pisa (toss) ka Malki ka la rai ban tied nyngkong ha kaba ka la lah ban kamai 214 ron haduh kaba kut jong ka 40 ober bad khyllem 7 wiket. U Sylvester Mylliempdah u la lamkhmat ha ka tied da kaba kamai 74 ron naki 97 tylli ki bol, katba u Junjun m Sangma u la kyrshan da kaba kamai 58 ron naki 49 bol.
Na ka liang ki rangkawang bol jong ka Nongthymmai kiba la seisoh ki long u Gaurav Narleng uba la khur 3/34 naki 5 ober bad u Aashish k Lohar uba la khur 1/21 naki 4 ober.
Haba wanphai ban tied ka Nongthymmai scc ka la lah ban kynjoh ïa ka thong da kaba pynsah sa 5 wiket ban jop ïa ka jingïalehkai, kata da kaba kamai 217/5 naki 35.4 ober. Watla na ka liang jong u Aiborlang Wahlang (khur 2/42 naki 5.4 ober) bad u Heimon Lyngdoh (khur 1/37 naki 8 ober) ki la lehkai bha ha ka bol hynrei kim shym la lah ban khanglad ïa ka liang pyrshah ban poi sha ka thong.
U Sagar Chetri u la long uba kongsan tam ha ka tied da kaba kamai ïa ka spah ron (100) naki 68 tylli ki bol, kaba la pynïoh ruh ïa u ban khur ïa ka khusnam Player of The Match. Katba na ka liang jong u Aashish k Lohar u la ïarap ïa ka kynhun da kaba kamai 38 ron naki 52 bol.
