Shillong, Naiwieng: Ka State Ophis ka Khadi & Village Industries Commission ha ka 30 tarik u Naiwieng 2022 kala pynlong ïa ka ‘Awareness camp’ ha kaba ïadei bad ka “PMEGP Scheme” hapoh Training Centre, Umran Ribhoi District.
La pynlong ïa kane ka prokram da ka jingthmu ban kyntiew ïa ka ïoh ka kot lyngba ka jingplie lad ha kaba ïadei bad ka jingseng ïa ki kam lajong. Ka mat jong kane ka prokram ka long; “Make Youth Job giver not Job seeker” lane pynlong ïa ki samla ba kin long ki nong ai kam ym ki nong wad kam.
Ha kane ka camp la pynshai ruh ha kaba ïadei bad ka jingpynurlong ïa ka ‘Aatmanirbar Bharat,’ kaba dei ka thong jong u Myntri Rangbahduh ka ri u Narendra Modi ban pynlong ïa ka ri kaba biang na lade.
La pynlong ruh ïa kane ka prokram shibynta ban wanrah shuh shuh ïa ki jingtyrwa kiba kongsan lyngba ka East Khasi Hills district namar ka jingpyntreikam jong ka jylla ha kaba ïadei bad kane ka skhim PMEGP ka duna shibun haba shim kyllum hapoh ka ri.
Kila don haduh kumba 50 ngut kiba la wan ïashim bynta ha kane ka prokram kiba kynthup ruh ïa u Mange Ram (Director KVIC, Shillong), ki nongmihkhmat na ka DCICRi-Bhoi , u Palash Barua (LDM State Bank of India,Ri-Bhoi ), Bah Donbor Sun (Co-ordinator, Rural Resources and training centre) bad u Father. K. Pakma (Director Rural Resources and Training Centre).
Nalor kata kasla don shuh shuh ka jingpynshai kaba bniah ha kaba ïadei bad kane ka skhim bad kumno ban poi sha ka thong ha kine snem 2022-23.
