Pynkup burom ka Ramakrishna Mission ïa ki khynnah kiba la pyndep ïa ka jinghikai computer
Shillong, Naiwieng: ïa ka jingïalang sam syrnot na ka bynta ka batch ba 97 jong ki shah hikai Computer bad ka batch ba 37 jong ki samla ba pule ïa ka ktien ka thylliej jong ka Ramakrishna Mission Vivekananda Cultural Centre la pynlong ha nongbah Shillong ha ka 29 tarik Naiwieng 2022.
Ha kane ka jingïalang, ka centre ka la sam 910 tylli ki syrnot sha ki samla pule computer bad ka ktien ka thylliej kiba la leh bha. Ka Ramakrishna Mission, Shillong, ka ai jinghikai kumba 6000 ngut ki samla ha ka shi snem ha ki sobjek Computer, ba la pynlong ha palat san bynta.
Ka jingpynkup burom kaba mynta ka sngi ka dei na ka bynta ki shah hikai jong u bnai Nailur haduh Naiwieng 2022, ki shah hikai jong ka batch ba 97 ki kynthup kumba 1200 ngut ki samla na ki bynta bapher bapher jong ki jylla ka thaiñ shatei lammihngi.
Ki samla kiba wan shakhmat ha ka jingpule Computer-Beginner ki kynthup ia ka Sandashisha Lyngdoh, Intermediate, PranteekBhattacharjee; Tally-I – ka Nakisaka Shangpliang ;Tally-II, Meba- ai-Shisha Syiem; DTP, Ladianghun Marbaniang; Web Designing & PC Maintenance, NikaDelecta Lyngdoh Nongbsap; Data base, Swarzina Swargiary; Cloud computing and Python, Sabyasachi Paul Purkayastha. ïa ki samla kiba la leh bha bad wan shakhmat la ai khusnam da ki memento bad la ai ruh artylli ki jingai sngewbha da ka computer ïa arngut ki samla pule computer ba tbit bha.
Ha ka jingai jingkren jong u ha ka jingïalang plie, u Vairagyachaitanya Maharaj, Deputy in charge jong ka institute, u la ai khublei ïa baroh ki samla pule bad u la kyntu ïa ki samla ban pdiang ïa ki jinghikai jong u Swami Vivekananda ban ïoh jingjop ha ka jingim bad u la ong ruh ba u briew u thaw hi ïa la ka jong ka lawei. U la ban jur ia ka jingdonkam jong ka pule puthi bad pynshlur ïa ki samla ba kin seng hi ïa la ki jong ki kam ha ka jaka ban ap ïa ki kam sorkar.
Ha kane ka jingïalang la ia don lang ruh ka Dr Mazel AmpareeenLyngdoh, MLA, East Shillong kum ka Kongsan.Ha ka jingkren ka Kongsan ka la ong ba ki briew kidei ban pynthymmai beit ïa la ki jingmut jingpyrkhat bad kim dei ban sahkut hajuh. Ka la ong ruh ba ki degree kim lah ban pynkylla ïa ki jingmut jingpyrkhat jong u briew. Ka ri jong ngi ka bun ki kam na ka bynta ki samla hynrei ki dei ban prat lynti hi ha ki kam ba thymmai. Ka la pynshlur ïa ki samla ban trei shitom bad ban shim ïa ki kam kiba sngewtynnad ha ki kompani bad ki jaka trei shimet bad ka la kyntu ïa baroh ba kin bud ïa la ki jingangnud.
U Swami Divyaswarup-anandaji Maharaj, Centre-In-Charge, u la pynkut ïa ka jingïalang da kaba ai khublei ïa baroh kiba don bynta bad u la pynkynmaw ïa ki kyntien jong u Swami Vivekananda ha ka Khasi bad phareng.