Shillong, Naiwieng : Hadien ba la dep jurip ryngkat bad ki heh PWD u MLA ka Mawlai u Bah PT Sawkmie hynne ka sngi Balang u la pynpaw ka jingkmen kaba khraw ba ki la ïoh ban siang rong thymmai ïa ka surok na Mawlai Petrol Pump ter ter sha Mawlai Mawroh bad mynta ki la sdang shuwa ban siang na Food Corporation of India (FCI) shaduh ïingmane Presbyterian Mawlai Mawroh.
U MLA ula pynpaw ba naduh ba tih ban siang ïa ki pipe jong ka Greater Shillong Water Supply Scheme (GSWSS) phase-III, ki paidbah ki la mad jingeh bha na kadaw ka jingsniew ka surok bad shen ki paidbah kin sa lait na kane ka jingeh hadien ba la dep siang thymmai lut ïa ka.
Ha kaba ïa dei bad kane ka surok bun ki paidbah ki la kynnoh leh aïu u MLA bad leh aïu ka tnad PWD, u bah Sawkmie u la pynpaw ba kane ka surok ka hap hapoh ka jong ka Central Division PWD bad na ka liang jong ki kim shym la shong klikti kumjuh ka PWD bad ka jingslem ka dei ba ki ap ïa ka tnad PHE ban pyndep ïa ka bynta jong ka.
“Ngi sngewkmen bha mynta ba la ïoh ban sdang ban siang ïa kane ka surok,” ong u MLA haba kren sha ki lad pathai khubor hynne ka sngi. Ha kajuh ka por u bah PT Sawkmie u la ai khublei kyrpang ïa ka tnad PWD bad kumjuh ïa u myntri ba khmih ia ka tnad u bah Prestone Tynsong, uba la mang ïa ka skhim kaba 3 klur tyngka eiei na ka Skhim Central Road Fund (CRF) na ka bynta kane ka surok kaba la tip kum ka long round road.
Nalor kata ula pynpaw ruh ka jingsngewkmen ban ïohi ïa u kontraktor ba shim ïa ka kam u don ïa ka jinglah ban pyntrei kaba long ka jingkyrkhu ïa u paidbah. U Bah Sawkmie u pynpaw ba ki kwah ban pyndep ïa kane ka surok shuwa ka Khristmas, lada kiei kiei baroh ki ïaid beit ïaid ryntih. Ha kajuh ka por u pyntip ruh ba kin sa siang rong noh ruh na surok PHC Mawroh ter ter sha Mawkynroh.
Shuh shuh u Bah Sawkmie u kyrpad ruh ïa kiwei ki kontraktor kiba tih na ka bynta ban siang pipe ha ki shnong bapher bapher hapoh Mawlai ba kin pynsted ïa ka jingtreikam jong ki khnang ba ki paidbah kin ym mad jingeh ha ka leit ka wan jong ki.
