Nongpoh, Nailur 17: Haka jingïakhun phainal jong ka lympung Inter District Cricket Tournament jong ki khynnah Khynthei kiba hapoh 19 snem ka rta hapdeng ka Ri-Bhoi District Cricket Association (RBDCA) pyrshah ïaka Shillong Cricket Association (SCA) ka la long shisha kaba shongshit bad kaba itynnad hadien ka jinglah ban lehkai bha jong ki thei ïalehkai kriket bad ha katei ka jingïakhun phainal ka RBDCA kala shah pynliem noh haka SCA tang da 2 run kaba la pynsngewsih kthang ïaki thei ïalehkai jong ka Ri-Bhoi.
Ïa katei ka lympung ïalehkai cricket jong ka Meghalaya Cricket Association kaba la pynlong daka Ri-Bhoi District Cricket Association ha madan kriket Pahamsning Nongkhrah, la wan ban pynhap pyrda noh da u President ka Meghalaya Cricket Association u Nababrata Bhattacharjee, haka jingïadonlang u President ka RBDCA u bah Rayonald Kharkamni uba dei ruh u Vice President ka MCA, Bah Michael Kharhunai Secretary ka RBDCA, Ma Arwotki Sumer, Apex Council member MCA, Bah Macdonald Kharsawian President SCA bad Apex council member MCA, Bah Dister Marbaniang President EKCA bad Chairman tournament committee bad u bah Disarius Kharmalki Secretary SCA.
Haba phai pat sha ka jingïakhun phainal ha katei ka sngi, ka kynhun jong ka RBDCA ka la jop ïaka jingïa kynting pisa bad ka la ailad ïaka SCA ban tied nyngkong. Haba tied nyngkong ka SCA ka la lah ban kamai haduh 157 run naki 35 tylli ki overs bad hap noh 7 wickets. Haba beh ïa katei ka thong ba la buh daka SCA, ki thei ïalehkai jong ka RBDCA ki la ïakhun tyngeh ban beh ïa katei ka thong hynrei kam shym la lah ban poi sha ka thong hakaba ki 35 tylli ki overs ki la kut noh bad ka la lah ban kamai tang 155 run bad duh noh 8 wickets bad ka la pynlong syndon ïaki thei ïalehkai ka SCA ban rah ïaka nam lahduh tang da 2 runs.
Napdeng baroh ki thei ïalehkai ki ba ïalehkai ha katei ka sngi ka Samla Ankita Sharma naka kynhun RBDCA ka la lah ban kamai haduh 83 runs bad khur 2 wickets bad ka la ïoh syndon ban rah ïaka nam Best Player of the Tournament bad ka samla Neelam Roy jong ka SCA ka la kamai 40 runs bad khur 2 wickets bad ka la ïoh ban rah ïaka nam Best Player of the Match.
