Pynliem ka Ïatylli FC ïa ka Mawsynrap SC ha ka Golden Jubilee Celebration FT 2024 ha Nonglang

Mawkyrwat, Risaw 31, 2024: Ka Ïatylli Football Club mynta ka sngi ka la pynliem noh pyrshah ïa ka Mawsynrap Sports Club da 3 – 2 kol ha ka lympung ialehkai kynjatbol jong ka Golden Jubilee Celebration Football Tournament 2024 ba la pynïaid da ka Nonglang Sports Club ha Madan Pyndenïewlyngdoh, Nonglang, South West Khasi Hills District.
Haba phai ha ka jingïalehkai hapdeng ka Ïatylli Football Club pyrshah ïa ka Mawsynrap Sports Club ka la long ka jingïalehkai kaba itynnad bha ha kaba naduh basdang haduh bakut jong ka regular time namarba baroh 2 tylli ki kynhun ki ïa biang kajuh ka bor.
Ha ka kyllastep la thep nyngkong eh da ka Mawsynrap Sc lyngba u bah Pilasbun Iawsai da ka kol ba itynnad bha ha ka minit ba 15 bad ka Ïatylli FC ka la ïoh pynïakhaid pat da ka kol ba itynnad na u Lastborn Marweiñ ha ka minit ba 26. Nangta shuh shuh ka Mawsynrap SC ka la ïoh biang ban pyntam ïa ka kol na u Pilasbun Iawsai ha ka minit ba 34 hynrei ka Ïatylli FC ka la ïoh pynïakhaid biang da ka penalty ba la kynjat da u Oversharp Ïawphniaw ha ka minit ba 40 bad haduh bakut ka kyllastep ki la ïoh ban ïa thep mar 2 kol.
Haba wanphai ha ka kyllamiet ka Ïatylli FC ka la ïoh ban thep ïa ka kol na u Firstborn Iawphniaw ha ka minit ba 81. Kumta ka Ïatylli FC lyngba ka jingjop mynta ka sngi ka la ïoh rung noh sha ka Quarter Final.
Ïa ka nam ‘rangïalehkai ba tbit ha kane ka sngi dei u Lastborn Marweiñ jong ka Ïatylli FC uba la ïalehkai bha bad uba la ïoh ruh ban thep kol ha kaba la sam da u bah Bryan Nongsiej.
Ha kajuh hi ka sngi, ka Nonglang Sports Club ka la ïoh ruh ban pynkup burom khublei ïaroh ïa u bah Aiboklangpaul Wanniang uba dei u khun jong u bah Polycarpus Marweiñ bad ka kong Therina Wanniang uba la wanrah nam bad burom ïa ka shnong ka thaw ïa ka sports club bad ïa ka dong ka thaiñ ha kaba ula jop ne ïoh takma ksiar ne Gold medal ha ka jingïakop ïa khun kti da ka kti ka diang bad takma rupa ha ka kti kamon ha ka Asian International Arm Wrestling Cup 2024 ba dang shu long shen hapoh Nongbah Mumbai ha ka 19 – 26 tarik u Risaw, 2024 ha kaba ïa ka jingpynkup burom la ïoh ban sam da u Myntri shnong, ki riew rangbah jong ka shnong bad ruh u President bad Secretary jong ka Nonglang Sports Club.