Pynkynmaw ka KSU ïa ka Sorkar MDA-II ban pynkha C&RD Block ïa ka Umdohlun ne Wahkaji
Shillong, Lber, 22: Ka Khasi Students’ Union (KSU) South West Khasi Hills Unit ha ka sngi Balang ka la pynkynmaw ïa ka Sorkar MDA-II ba ka por ka la ih ban pynkha sa kawei ka Community and Rural Development Block (C&RD) ha Umdohlun lane ha Wahkaji, kiba long ki shnong kiba hap hapoh ka South West Khasi Hills.
Ha ka jingïakren bad ki lad pathai khubor, u President ka KSU South West Khasi Hills Unit u Bah Forwardman Nongrem u la ong ba kane ka jingdawa ban pynkha ïa ka C&RD ha ka thaiñ ka long naduh u snem 2015.
U Bah Nongrem u la ïathuh ba ki don 30 haduh 40 tylli ki shnong kiba hap hapoh ka Wahkaji bad Umdohlun kiba jngai kumba 2-3 kynta ka jingïaid lynti na Mawkyrwat bad Ranikor.
Da ka jingpynkha ïa ka C&RD ba thymmai ha Umdohlun lane ha Wahkaji kan weng ïa ka jingeh jong ki paidbah kiba shong sah ha ki shnong kiba kham kyndong, u la ong.
U la ïaroh ïa ka jingshimkhia jong ki MLA jong ka South West Khasi Hills bad ka Mawsynram ban rah ïa kane ka mat kaba donkam hapoh ka Iingdorbar Thawaiñ jong ka jylla.
“Ngi sngewnguh shikatdei eh ïa ki MLA jong ka District kiba la rah ïa kane ka jingdawa bad ngi kyntu ruh ïa ki ban buddien na ka Sorkar Jylla namarba ki dei kiba don bynta lang hapoh ka Sorkar MDA-II,” ong u Bah Nongrem.
U la ong ba ka Sorkar ba thymmai ka donkam ruh ban kyntiew kyrdan ïa ka Mawsynram C&RD Block sha ka Civil Sub-division namarba ka dei kawei na ki C&RD Block kaba la rim tam naduh ba la pynkha ha u snem 1962 ba kaba don palat 160 tylli ki shnong.
“Ka Mawsynram ka dei kaba jngai kumba 50 kilomitar na Shillong hynrei ka long kaba donkam ïa ka Sorkar ban kyntiew kyrdan noh ïa ka Mawsynram CRD Block sha ka Sub Civil division. Namarkata, ngi kyntu ïa ki MLA ba kin buddien halor kane ka jingdawa na ka Sorkar,” la bynrap u Bah Nongrem.
Shuh shuh u la bynrap ba ka Seng kam pyrshah lada ka Sorkar ka rai ban pynkha ïa ka C&RD Block ha kano kano ka bynta jong ka Jylla hynrei ka Sorkar ka dei ban kham pyrkhat shwa mynta ka kynti ban pynkha ïa ka C&RD Block ha Umdohlun lane ha Wahkaji.