Shillong, Nohprah 18: Ka Meghalaya Speed Skating Association [MSSA] hynnin ka Sngi Saitjaiñ ka taïew ba ladep ka la pynkut noh ïa ka jingïakop kaba la tip da ka 2nd Meghalaya Open Speed Skating Championship 2023.
Ka MSSA ka la khylliap noh ïa katei ka lympung ha ryngkat ka jingïasylloklang bad ka St. Anthony’s Higher Secondary School lem bad ka Meghalaya Roll Ball Association kaba la pynlong ha madan skul jong ka St. Anthony’s Higher Secondary School.
Lah ban kdew ba kane ka Championship ka la khring haduh 50 tam ki khynnah kiba ïashimbynta katkum ka snem ha ki kyrdan bapher bapher, bad ruh na ki skul jong ki district bapher hapoh ka jylla.
Lyngba kane ka rynsan, ki khynnah ki la lah ban pynpaw pyrthei ïala ka jong ka sap ka phong kaba ki don, la ka dei ha ka liang ka jingsted ban skate bad kiwei kiwei ruh de.
Shuh shuh, kane ka championship ka la iarap shibun ha ka ban wanrah bad pynshlur ïa ki khynnah ban don ïa ka mynsiem ïaleh hapdeng jong ki bad kumjuh ruh ban nang pynkiew shaphrang ïa kane ka jingïalehkai khamtam eh ha kane ka jylla.
Haba ai jingkren ha katei ka sngi na ka liang jong u Bah Suklang Dkhar-President jong ka Meghalaya Speed Skating Association ha kajuh ka por u General Secretary jong ka Meghalaya Roll Ball Association, u la pynpaw ïa ka jingsngewkmen ha ka ba kane ka championship ka la long kaba seisoh ba ki nongïashim bynta ki lah lehkai bha met bad mynsiem.
“ Ngi donkam ban dang trei shitom ban kyntiew shaphrang ïa kane ka speed skating hapoh Meghalaya” la bynrap u Bah Suklang Dkhar. La ïoh ban sam khusnam da ki takma ryngkat bad ki Certificate sha ki lahduh kiba la jop ha ki kyrdan bapher bapher.
Shuwa ban pynkut na ka liang jong ka Association ka la pynpaw ïa ka jingsngewsnguh ka ba khraw ïa baroh ki dkhot nongkitkam, naduh i Principal jong ka St. Anthony’s Higher Secondary School, ki kmie ki kpa bad baroh ki nongïashim bynta, ki ba lah wanrah ïa ka jingjop bad ruh ban pynlong ïa kane ka championship kaba seisoh.
