Shillong, Nohprah 18: Ka kynhun ïalehkai jong ka Mawtawar SC ka la ïohrung sha ka final ha ka 2nd DIVISION Football League 2023 ba la pynïaid da ka Shillong Sports Association bad kane ka la wan hadien ba ka la pynliem ïa ka Nongrah SC ha ka jingïakhun semi final ba ar hynne ka Sngi ha SSA Ground.
Ka jingïaknieh ban ïoh aireng ha ka final hapdeng kine ki ar kynhun ka la sdang ha ka por 1:45 baje mynsngi, bad ka jingïalehkai ka la kut da ka Mawtawar SC kaba la jop da 2 – 1 kol ïa ka Nongrah SC ban ïohrung sha ka final.
Dei ka Nongrah SC kaba la ïoh ban pynkhihjar nyngkong lyngba u Kerionald Pyngrope tang hadien 6 minit ba la ïaid ka por hynrei ka Mawtawar SC ka la ïoh pynïakhaid shuwa ban kut ka kylla step lyngba u Elnathan Donkupar wahlang ha ka 41 minit.
Ka jingïakhun ka la long kaba itynnat bad ïakhaid bha ha ka kylla kaba ar, naba baroh ar kynhun kim shym la lah ban pynkhihjar shuh shi slem tad haduh ynda la jam sha ka 85 minit ba u Fredrick Lyngdoh u la thep ïa ka kol kaba ar na bynta ka Mawtawar SC ban pynthikna ïa ka namjop.
Lyngba kane ka namjop, ka Mawtawar SC kan sa aireng pyrshah ïa ka Pohkseh SC ha ka jingïaknieh namlahduh ha ka 2nd Division Football League mynta u snem, na ka liang jong ka SSA ka la pynkhreh ban pynlong ïa ka final ha ka 21 tarik Nohprah 2023 ha madan lehkai 1st Ground ha ka por 1.30 baje mynsngi.
Shuh shuh, ka Association ka la kyrpad ruh ïa ki nongkitkam jong ka synjuk ban ïadonlang ha katei ka sngi.
