Pynkut ka shnong Umdihar ïa ka taiew leh kmen ki samla ryngkat ka jingpynkup burom

Nongpoh, K’Lyngkot 03: Ka seng samla jong ka shnong Umdihar ha ka 31 tarik Nohprah 2024 ka la pynkut noh ïa ka taiew lehkmen jong ki samla ka shnong Umdihar hapdeng ka jingiphuh iphieng da ka jingïashimbynta shitrhem jong ki khun samla ha ki jingïakop bapher bapher ba la sdang naduh ka 28 tarik u Nohprah 2024.
Ïa ka taïew lehkmen jong ka shnong Umdihar la wan ban pynhap pyrda da u Bah Rocky Marweiñ kum u kongsan, ha ka jingdon ryngkat u Bah Romel Lyngdoh Rangbah Shnong ka Shnong Umdihar, u Samla Marlikiy Syngkli President Seng Samla Umdihar, U Bah Bokstar Syiem President Umdihar Sports & Welfare Club, ki riew rangbah, ki longkmie lem bad ki paidbah nongshong shnong.
Ka jingthmu jong ka seng samla ban pynlong ïa kane ka taiew lehkmen ka long kum shibynta ban wanrah ka jingïatylli ka jinglong kawei hapoh ka Shnong ka thaw, bad ha kane ka taiew lehkmen na ka liang ka seng samla ka la pynlong ruh ïa ki jingïakop bad ki jinglehkai bapher bapher.
Ka Seng Samla ka la sam ruh ïa ki khusnam sha ki nongjop ha ki jingïakop bapher bapher bad la pynkup burom ruh ïa ki ar ngut ki khun samla jong ka shnong kiba la wan rah nam bad burom ïa ka shnong lyngba ka jingïalehkai Sports ba kyntup ïa ka samla Bethlyne Grace Makri bad u Samla Badondor Marbaniang bad hakajuh ka por la pynkup burom ruh ïa ki khun samla ki ba la pass bha ha ka Examination SSLC bad HSSLC.
Ha ka sngi pynkut ki samla ki la shimbynta ruh haki jingshad bad jingrwai bapher bapher bad kumjuh ruh ka jingïakop thei bhabriew bad ryngkynsai jong ka Shnong Umdihar bad ha ka jingïakop thei bhabriew bad ryngkynsai jong ka Shnong Umdihar la rah da ka samla Babylon Lyngdoh ïa ka nam Miss Umdihar bad u Baïatiplang Shadap ïa ka nam Mr Umdihar.