Shillong, Nailar 29: Ha ka jingwan jngoh ba kongsan sha ka tnat treikam kynhun shipai National Cadet Corps (NCC), NER(Shillong), u C.H. U Vijayashankar, u Lat ba donburom jong ka jylla Meghalaya, u la ai ka jingkren ryngkat ki ktien ai mynsiem kaba pynksan ïa ki jingnoh synñiang jong ki shipai India bad ïa ka bynta jong ka NCC ban pynwan dur ïa ki nongïalam ha ka lawei.
U Lat u la sdang ïa ka jingkren jong u da kaba ai burom ïa ki jingaiti ba la aiti da ki shipai jong ka ri India, da kaba kubur ba dei da ka jingaiti lut jong ki ba ngi lah ban pynroi bad pynsan ïa ki pateng ban wan ryngkat ka jingshngain bad jingkyrmen. Ka jingkren jong u ka la pynpaw ïa ka bynta kaba kongsan jong ki kam bapher bapher jong ka NCC ha kaba ïadei bad ki kam pynroi ïa ka jinglong ryntih bad ka jingaiti ha ki samla.
Haba kren ha ki paidbah ha kane ka sngi rakhe ïa ka National Sports Day, u Lat ka jylla u la ïaroh ïa ka jinglen lade jong ka NCC bad ïa ka jingtrei shitom jong ka ban wanrah ïa ki soh kiba bha. U la ai ka jingïaroh sha kane ka Organistion ïa ka jingïatreilang jong ka lada don kino kino ki jingjia ba sngewsih, da kaba kdew ba kumno ka NCC ka jinghikai pynkhreh ïa ki cadet ban pynwandur sha kum ki nongialam, ka jinglah ban shah, bad ka jingshlur.
U Lat u la pynpaw ruh ïa ka jingithuh ïa ki samla pule kiba la ïoh ïa ki syrnod ‘C’ jong ka NCC ha ki kam sorkar ryngkat ki jingpule kiba kham shalor. U la ai mynsiem ïa ki Cadet ban rah shakhmat ïa ki jinghikai ba ki la ïoh ha ka jinghikai jong ki ha ka NCC, ki ban dang long kiba kordor ha ka jingim jong ki baroh kawei.
Kum ka jingai khublei, u Lat ka jylla u la aiti ïa ka momento sha u Major General Gagandeep, u ADG NCC, NER bad ka khusnam pisa sha ki thei samla jong ka NCC Brass Band.
Ha kaba pynkut, u Lat ka jylla u la pynthikna ïa ka NCC, NER ia ka jingïarap kaba pura bad ka jingkyrshan kaba khlem sangeh na ka liang ka Raj Bhawan .
