Pynkup burom ka skul Balang Presbyterian, Thynroit ïa la ki nongseng ha ka jingdap 50 snem
Shillong, Nohprah 14: Ka Thynroit Presbyterian Upper Primary School ha ka taiew ba la dep ka la pynkup burom ïa la ki nongseng jong ka kaba long shi bynta ka jingrakhe dap 50 snem ka skul ha ka jingïalang kaba i shongkun haduh katta katta.
Ha kane ka jingïalang la wan ban ïadonlang da u Bah Banteidor Lyngdoh, MLA ka Mawkynrew kum u kongsan, u Bah Martle N Mukhim uba dei u MDC kum u symbud kongsan, u Bah Harkin Warjri, Sordar ka shnong Thynroit nalor kiwei pat kynthup ki nongpynïaid barim bad ba mynta kane ka skul, ki nonghikai lem ki khynnah skul.
La sdang ïa ka jingïalang da ka jinglam khmat da u Bah P Kharrngi, Headmaster bad ka jingduwai da u Rev N Lymba, ka jingkren pdiang sngewbha na u Tymmen Basan H Kharumnuid, bad bud pat da ka jingpynkup burom ïa ki Chairman, Secretary, Headmaster barim kane skul da ki nongïalam ka Jingïaseng Kynthei Balang Thynroit.
Hadien ka jingpule ïa ka histori lyngkot shaphang kane ka skul da u Bah S Nongspung, Secretary barim bad bud pat da ka jingplie paidbah ïa u maw-sahkynmaw ka jingdap 50 snem ka skul da u kongsan.
Nalor ki jingshad jingrwai na ki khynnah skul, la ïoh ruh ïa ka jingkren na u Headmaster ba nyngkong eh ka skul, u Bah H Kharumnuid, uba la pynkynmaw shaphang ki por bad ki jingïaid lynti ka skul ha ki snem ba la sdang ïa ka naduh u snem 1973.
Hadien kane, u Bah Harkin Warjri, Sordar Shnong u la pynpaw ba ka skul ka la nang kiew shaphrang bad ka jingdon jong ka hi ka la long ka jingsarong ïa ka shnong bad ka thaiñ hi baroh kawei.
U Bah Martle N Mukhim u la shim ïa ka bynta ban pynkup burom ïa ki khynnah skul kiba la pass ïa ka eksam Secondary School Leaving Certificate mynta u snem jong kane ka skul bad ha ka jingai jingkren u la ai ki kyntien kyrkhu kyrdoh ba ka skul kan nang ïai kiew sha khmat ha ki liang baroh.
Na ka liang u Bah Banteidor haba ai jingkren kum u kongsan u la ong ba kum u nongmihkhmat u tyrwa ban don ïa ka jingïatreilang khnang ba ka skul bad ka thaiñ hi kan kiew sha khmat.
Kum ban shu kdew ba dang ha u bnai Jylliew, 2023, u Bah Banteidor u dang shu wan plie ïa ka ïing skul ba thymmai jong ka Secondary Section kaba dei shi bynta jong kane ka skul na ka mang tyngka jong ka skhim Special Rural Work Programme (SRWP) 2022-2023.