Shillong, Nohprah, 17: Ka Voice of the People Party (VPP) ha ka sngi Thohdieng ka la dawa ïa ka Sorkar Jylla ba kan pyndap noh ïa ki 8 tylli ki post kiba shu sah thylli ha ka tnat Agriculture bad bad Horticuture ha Ribhoi District naduh u snem 2010.
Ha ka dorkhas ba la phah sha ka Myntri ka Rep ka Riang ka Sorkar Jylla ka Dr. M. Ampareen Lyngdoh lyngba u General Secretary Dr. Ricky A.J Syngkon, ka VPP ka la ong, “ka tnat, namarkata ka donkam bha ïa ka jingphaikhmat ym tang ha kaba pynsdang ïa ki skhim bapher bapher hynrei kaba kham kongsan eh ka long ban pyntreikam ïa ki. Ka jingpyntreikam pura ïa ki skhim bad ka jingpynsdang ka shong eh ha ki Field Officer. Hynrei, halor kane ka mat, ka long kaba pyndiaw mynsiem ban tip ba ki don bun tylli ki post kiba shu sah thylli mynta da ki snem khamtam ha Ri Bhoi District.”
Ka VPP ka la pyntip ba ki post kiba sah thylli ki long ha ka ophis Horticulture Development Officer, Nongpoh naduh u snem 2013, ha ophis Horticulture Development Officer (HDO) Umling Block kaba thylli naduh u snem 2017 3, ha ophis Horticulture Development Officer (HDO) Umsning Block kaba thylli naduh u snem 2020, ha ophis Agriculture Development Officer (ADO) Marketing Nongpoh kaba sah thylli naduh u snem 2019, ha ophis Agricuhure Development Officer (ADO) Bhoirymbong Circle kaba sah thylli naduh u snem 2010, ha ophis Agriculture Development Officer (ADO) Patharkhmah Circle kaba thylli naduh u snem 2016, ha ophis Agriculture Development Officer (ADO) Umling Block kaba thylli naduh u snem 2020 bad ha ophis Agriculture Development Officer (ADO), Nongpoh kaba thylli naduh u snem 2020.
“Namarkata, ngi kyntu ïa phi ban shimkhia mardor halor kane ka mat bad ngi kyntu ruh ïa phi ba phin thawlad ban pyndap noh ïa ki post kiba sah thylli kham kloi khnang ban pynthikna ba kin tyllun bad kin treikam pura na ki ophis ba dei peit,” la ong ka VPP ha ka dorkhas.
Ka VPP ka la kyntu ruh ïa ka Sorkar ba kan pynkha shuh shuh ïa ki post ha kane ka tnat, khamtam ha Ri Bhoi District bad ha kiwei kiwei ki Distrik.
