Hakhmat u Dy.CM yn pyntip ba khlad ka longkmie ba kylla kali hapdeng surok sniew ha Nongryngkoh

Shillong, Nohprah 17 : Khyndiat sngi hadien ka jingkhlad noh jong kawei ka longkmie na ka jingkylla ka kali kamai ha surok Nongryngkoh, na ka liang u Bah Kansing Lyngshiang u la ong ba shen ryngkat bad ki samla na katei ka thaiñ kin leit ban kynduh markhmat ïa u Symbud Myntri Rangbah ka jylla, Bah Prestone Tynsong khnang ba kin phah shna noh mardor ïa katei ka surok kaba la buh ka jingma kaba khraw ïa ki nongleit nongwan namar ka jingsniew palat ka surok.
U Bah Kansing uba dei ruh u kyrtong ka NPP ha ka elekshon MLA ba la dep na Mawkynrew constituency u la ong ba ki sngewsih haduh katta katta ba tang namar ka jingsniew palat ka surok, ka la poi haduh u pud ba ka kmie jong ki 7 ngut ki khun kan duh ei ïa la ka jingim.
“Shen ngin leit ban kynduh ïa u Symbud Myntri Rangbah ban pyntip halor kane ka jingjïa bad kyrpad ïa ka sorkar ba kan thaw ki lad ki lynti ban phah maramot bad siang rong noh ïa kane ka surok na Nohron sha Nongryngkoh khnang ba kum kitei ki jingjia ba sngewsih kin ym jia shuh,” u la ong haba kren bad ki lad pathai khubor dang shen hadien ba la wai ka prokram.
U Bah Kansing u la ïathuh ba katei ka jingkylla ka kali kadei namar u nongñiah um lah shuh ban tehlakam ïa ka kali namar ka jingsniew palat ka surok. Hynrei u ong pat ba donbok pat ba kiwei ki nongshong ha katei ka kali ki shu mynsaw malu mala.
La ïathuh ruh ba ki nongshong shnong katei ka thain ki mad ïa ka jingeh kaba khraw namar ha ka por Lyiur lei lei ki hap ban ïaid da ka kjat la ka long ban kit ïa ki marbam bad wat haba don ba pang ba shitom ruh kumjuh.