Nongpoh, Risaw 06: Ka Ri-Bhoi Mihngi Sports Association (RBMSA) da ka jingsngew sarong kala pynkup burom ïa u Samla Lionel Daryll Rymmei u rangap kol ba kynsai ka ri India ha ïing sah jong u ha Umroi, u ba la ioh nam ruh kum u Best Goal Keeper haka SAFF U-19 Championship kaba dang shu kut shen ha Nepal.
Ka Ri-Bhoi Mihngi Sports Association (RBMSA) kaba dei kawei naki seng kaba dang shu mih tymmai da ka jingangnud ban kyntiew ïaki samla ka thaiñ Ri Bhoi Mihngi haka kam ïalekai sports, lyngba ki nongïalam jong ka ba kynthup ïa u Bah Hesparlin Marwein Coach C License, Centre Barim, IK Shadap, B Dkhar kila pynpaw ka jingsarong kaba khraw bad ka jingkmen ban iohi ba u khlur na Ri-Bhoi District bad ka jylla Meghalaya u la ioh ban shim bynta bad ban mihkhmat wat naka ri India haka lympung South Asian Football Federation hadien ba ka ri India kala ioh ruh ban rah ïaka nam lahduh ha katei ka lympung hadien ba pynliem ïaka Pakistan da 3-0 kol.
Naka liang ki nongïalam katei ka kynhun kila pynpaw ruh ba kane ka dei ka nuksa ïa kiba bun ki khun samla ha ka jylla kiba don haka sap bapher bapher bad kumjuh ruh ka sap ïalehkai ba kim dei ban pynlehnohei ïaka por hynrei ban pynjanai bad ban minot thop, khnang ba kin poi sha ki kyrdan ba kham shalor kaba long ka jingsarong ïaka iing ka sem, ka shnong ka thaw bad ka jylla hi baroh kawei.
