Shillong, Risaw 06 : Ka long ka jingsngewsarong ïa ka Tura Golfers Association ha kaba u wei na ki dkhot jong ki, u Johnwell G Momin, u la shah jied ban mihkhmat ïa ka Meghalaya ha ka National Games 2023, ka ban sa long ha Goa ha u Naiwieng 2023 ha rynsan tied Golf jong ka thup Professional Players Category.
U Johnwell G Momin, khun jong u Rojinush R Marak bad ka Promila G Momin napoh New Tura, Matchakolgre, Tura u la sdang ban lehkai Golf naduh ba u dang don14 snem hadien ba ïoh jinghikai lem bad ki jingkyrshan na u Billykid A Sangma (MLA barim jong ka Tura Constituency) u ba dei u wei napdeng ki rangbah napoh ka thaiñ Garo Hills ba ju sngewtynnat ban lehkai Golf.
U Johnwell G Momin u dei u nongtied golf ba nyngkong na Garo ban ïoh shimbynta ha ka kyrdan Professional level golf ha India. U la leit ban pyntbit ïalade ha ka PGTI Qualifying School ha u snem 2014 bad shimbynta ruh ha ka Chief Ministers Cup 2014 kaba la pynlong ha Shillong Golf Course kaba dei ka lympung National Championship Cup hapoh ka jingkhmih jong ka PGTI (Professional Golf Tour of India).
Ha ka jingïaid lynti ka jong u Johnwell G Momin kum u nongïalehkai Golf, u la ïoh ban khur shibun ki namjop ha ki lympung state level, dang shen u la jop ïa ka “The Cloud 9, Summer Golf Tournament” ha Shillong Golf course ha u bnai Nailar, 2023.
U Johnwell G Momin, kpa jong i khun kynthei ba dang shi bnai, u dei u rangbah ba khlem kam hynrei u la pyndonkam ïa ka sap ka jong u ban kyrshan ïa ka ïing ka sem hapdeng ki jingeh, bad u trei kum u Golf Coach, kaba u ju ai jinghikai na bynta ki khynnah kiba sngewtynnat ban tied Golf. U ju ai jinghikai ruh ïa ki rangbah kiba kynthup ïa ki ophisar na ka Armed forces bad Air Force.
Kumba ka paw, u Johnwell G Momin mynta u pynlut ïa ka por ka jong u ban ai ka jingshakri kum u Coach ha ka ïalehkai Golf ban kyrshan ïa ka ïing ka sem, ha kajuh ka por ban pynkhreh ïa ka National Games bad ruh ïa ka Exam na bynta ka Meghalaya Police Service kaba u la shah jied.
Na ka liang jong u Johnwell G Momin, u la ong ba ka Golf ka dei ka jingïalehkai ka bym pat da paw ha Garo hills bad ki don tang khyndiat ngut kiba ju sngewtynnat ban lehkai ha Durama Golf Course , 9 Hole Golf Course, kaba dei ka jaka jong ki BSF ha Danakgre, Tura. Kawei na ki thong jong ka Tura Golfers Association ka long ban pynsaphriang bad kyntiew ïa ka Golf sha kane ka thaiñ lyngba ki training camp ha ki skul ha Tura ïa kaba na ka liang jong ka kynhun ka ap khmih ban ïoh jingkyrshan na ka tnat ba dei khmih ïa ka kam ïalehkai jong ka sorkar jylla (Sports Department).
