Pynkup burom ka Meghalaya Professional Boxing Council ïa u Shanborlang Marbañiang

Shillong, Nailur 19: Ka synjuk kaba ju shakri ïa ka kam ban kyntiew ïa ki samla ha rynsan ïakura professional jong ka jylla, kata ka Meghalaya Professional Boxing Council (MPBC) hynne ka Sngi Hat Majai ka la pynlong ïa ka prokram ban pynkupburom ïa u samla Shanborlang Marbañiang u ba la wanphai na ka lympung ïakura professional kaba la long ha New Delhi.
Ha kane ka sngi la ïadonryngkat baroh ki dkhot nongkitkam jong ka Meghalaya Professional Boxing Council kiba kynthup ïa u Ricky Cooper Pathaw (President), u Bah Phrangbhalang L Mawnai (Working President), u Kampherki Thangkhiew (Genera Secratary) bad kiwei kiwei
Na ka liang jong ka synjuk ka la khot ïa u Bah Hopefullmoon L Mawnai, Finance Secratary KSU Upper Shillong & Asst. Organising Sec. Central Body kum u kongsan ryngkat bad u Bah Shngaiñlang Sohkhlet President KSU Upper Shillong kum u symbud kongsan.
Haba ai jingkren ha kane ka prokram na ka liang jong u kongsan u la pynpaw ïa ka jingsngewsarong na bynta u Shanborlang Marbaniang u ba la wanrah nam bad ka burom ym tang ïa ka thaiñ hynrei ïa ka jylla hi baroh kawei.
U la ong ruh ba u samla Shanborlang u long ka nuksa na bynta ki heprit jong ka thaiñ bad kitbok ruh ïa u ban dang treishitom khnang ban poi sha ka thong bad ruh ban ïohkheit ïa u soh ka jingjop. Shuh shuh, u la kyntu ruh ïa ka synjuk (MPBC) ba kan dang bteng ïa ka jingshakri jong ka kumno ban khring ïa ki samla ha kam lehkai khnang ba kin lait na kino kino ki kam sniew khamtam ha kane ka juk kaba la jyllei ki kam khaïi drok.
Kumban shu pynkynmaw, ha ka 16 tarik u Shanborlang u la pynshaïong ïa u Adil Rajesh Kumar Singh u ba dei u International Boxer napoh Mumbai, hynrei wat u ne u rangïakura ba la bat ïa don ha kane ka kyrdan u khlem shym la lah ban pynkhyllem ïa u Shanborlang bad ïakhaid lyngba ka rai na ki nongbishar.
Nalor ka lympung kane ka lympung kaba dang shen ha New Delhi, u Shanborlang Marbañiang ryngkat bad arngut kiba kynthup ïa u Elbin Rani bad u ïarapborsing Kharbani ki don mynta ha ka jingpynkhreh ban leit aireng sa ha ka rynsan ïakura Pro Boxing Fight Night ka ban sa long ha Gujarat.
Na ka liang jong u Elbin Rani un sa ïakhun ha ka kyrdan Feather Weight pyrshah ïa u Saleem Khan (Jammu & Kashmir), u ïarapborsing Kharbani ha ka kyrdan Bantamweight pyrshah ïa u Devanant Anil Kumar (Telangana) katba u Shanborlang Marbañiang (Fly weight) un sa ïakhun pyrshah ïa u Anakapali Madanpratap (Andhra Pradesh). Bad na ka liang jong ka seng KSU bad ruh ka MPBC ki la kitbok kitrwiang na bynta kine baroh lai ngut ban ïoh kheit ïa u soh ka jingjop ha kane ka lympung ka ban long ha ka 24 tarik mynta u Nailur.