Ha ka election MLA 2023 la ïohi ba ki don ki seng saiñ pyrthei kiba la buh ïa ki mat ban phiah ïa ka jylla ha ki ar bynta kata ka jylla Garo bad ka jylla Khasi Jaintia. Hooid lada pyrkhat ha kawei ka liang ka long kaba sngewdei hynrei ha kawei pat ka liang ngim sngew ïahap satia namar nalor ba ka dei ka jylla kaba la rit lypa lada phiah shuh shuh ïaka ym tip aiu kan jia ïoh shah pynkylla Union Territory bad duh lut ki aiñ ki kanun ba la thaw da ka sorkar jylla Meghalaya.
Namar wei ba la shah pynkylla Union Territory kawei ngi dei ban kynmaw ïa ka synshar khadar lah ban shimti noh da ka sorkar pdeng kata da u President ne da u Lieutenant Governor ban thung da u President. Ka sorkar pdeng ka lah ban leh ïa kane da kaba suk eh hynrei ka jingma pat ka ap ïa ka ri bad ka jaidbynriew namar ïa ki aiñ ruh lah ban thaw bad pynkylla da ka sorkar pdeng. Kumta kaei kaba nga sngew ka long, la ngi ïapher ka ktien ka thylliej hynrei ngi dei ki paid riewlum bad ngi ïa long kum shipara la ki dei ki paid Khasi, Pnar ne Garo ruh. Ngi la ïa im lang mynta la 50 snem hapoh kawei ka jylla balei pat ngin dang kwah ban pharia shuh shuh ïa ine i jylla ba rit jong ngi.
Kaei kaba kongsan ka long ba ngin ïatrei lang kum ki paid nongshong shnong ban kyntiew bad pynïaid shakhmat ïa ka jylla. Khamtam ba kane ka jylla ka dei ka jylla kaba la kyrkhu shisha da U Blei. Ka don ha ka ka spah mariang, ka jingiphuh i phieng bad itynnad ki lum ki wah, ki dieng ki siej, ki syntiew ki skud bad ka jingithiang ka mariang ki dei kiba u Blei u la kyrkhu kyrpang ïa kane ka jylla. Kaba kongsan ka long ba ngin pynneh pynsah ïa kine ki jingkyrkhu kypang jong U Blei. Kane ka jylla ka dei ka jylla kaba khring bha ïa ki nongwan jngoh kai na kylleng ka ri bad kylleng ka pyrthei ruh. Lada ngi nang ban sumar ïa ki jingkyrkhu jong U Blei ïa kane ka jylla kane hi kan long ka spah bah ka ban ai kam ai jam ïa ki samla. Namar lyngba kane ka kam jngohkai kiba bun ki samla bad ki longïing kin ïoh im ja.
Kaba kongsan eh ka long ba ngin wanrah ïa ka jingshong suk shongsaiñ bad ïa im suk im saiñ ym ban ïadon ka jingsngew ïapher jaidbynriew ne ban don kano kano ka jingthmu ban wanrah ka jingïapait ïapra kum ki nongshong shnong hapoh ka jylla Meghalaya ba ieit jong ngi. Balei kiwei kiwei ki jylla ha kane ka thaiñ bad ha kylleng ka ri ki kiew sted kawei ka dei ba ki jylla ki shongsuk shongsaiñ bad kumta ka sorkar ruh ka ïoh bun ka por ban pynlut ha kaba wanrah ïaka roi ka par hapoh ki jylla. Hynrei ngi ha kane ka thaiñ ka daw jong ka jingsahdien ka dei namar ba la jur ki jingïakhih, jingïaumsnam bad thut palat ka shongsuk shongsaiñ.
Hooid u don u pud ba hap ban ïakhih bad ïa pynpaw pyrshah lada ki bor synshar ki wanrah ïakino kino ki aiñ kiba khniot beiñ ne teh mraw ïa ka jaidbynriew ne kiba buh ïaka jaidbynriew ha ka jingma. Hynrei haba ïakhih ruh ka la dei ka por ban ïakhih da kaba jai jai bad khamtam da ka bor jabieng ym dei shuh ka juk ban ïakhih da ki jingïaumsnam. Namar dei tang ka bor jabieng kaba lah ban pynkylla khongpong ïa ki rai jongka sorkar lyngba ka miej jingiakren.
Kumta ka jingkhot ïa ngi iwei pa iwei na ki paid nongshong shnong ka long to ngin ïa imsuk imsaiñ bad ïatrei lang da kawei ka thong ban kyntiew bad pynïaid shaphrang ïaka jylla khnang ba kan long kawei na ki jylla kaba paw bad ïaid shakhmat ha kine ki snem bad por ban sa wan.
