Pynkup burom ka MAA ïa u GS-Bah Finely L Pariat hadien ba shah jied kum u Joint Secretary ka AFI

Shillong, Kyllalyngkot 22: Ka Ka Meghalaya Athletics Association ha ka sngi nyngkong ba la sdang ïa ka jingïalehkai ha ka 6th Meghalaya Games 2025 kaba la long ha Wahiajar Complex ka la pynkup burom ïa u Bah Finely L Pariat General Secretary ka Association halor ka jingshah jied jong u kum u Joint Secretary jong ka Athletics Federation of India.
U E M H Passah – Senior Vice President jong ka Association u la pynïaid ïa kane ka jingïalang pynkup burom ha ka jingïadonlang u Wailadmiki Shylla – MLA ka Jowai Constiteuncy.
Kiwei pat kiba la donlang ha kane ka prokram ki long u Working President ka Meghalaya State Olympic Association – Bah John F Kharshiing, Paia B W Nongbri Assistant Director jong ka Directorate of Sports and Youth affairs.
Ka Meghalaya Athletics Association ka sngew sarong shibun ïa kane ka kyrdan kaba khraw ba la ïoh da u wei na ki nongïalam ba kongsan jong ka, bad ka ngeit skhem ba hapoh ka jingïalam jong u bad ka jingdon jong u ha ka synshar khadar ka jylla Meghalaya kan long ka jingmyntoi.