Buh mawnongrim u Conrad ban tei ïa ka Secretariat ba thymmai ha Umsawli ba kot 1188 klur

Shillong, K’ Lyngkot 21: U Myntri Rangbah ka Jylla Meghalaya Conrad K Sangma ula buh ïa u maw nongrim ban tei ïa ka Secretariat ba thymmai jong ka Shillong Administrative Cite ha Umsawli, New Shillong, kaba la mang ban tei haduh T.1188 klur ha kaba ha kane ka prokram la wan ban ïashim bynta da ki heh ki haiñ bad kiwei kiwei kiba la shah khot sngewbha.
Ha kane ka prokram la ïadonlang ki Symbud Myntri Rangbah- Bah Prestone Tynsong bad Bah Sniawbhalang Dhar, ki Myntri Sorkar Abu taher Mondal, kong Ampareen Lyngdoh, Marcuise Marak bad Bah Comingone Ymbon.
Ïa kane ka Secretariat ba T.1188 klur yn tei ha ka jaka ba heh 53 acre bad yn tei ïa ka ha ryngkat ka Directorate Campus,ki ban pyntrei ha ki artylli ki phase. Ka Complex kan don 68 tylli ki Ophis, ka Auditorium ba ngiam 700 ngut ki briew, bad ki kamra na ka bynta ki 1929 ngut ki nongtrei.
Ka phase ba-ar jong ka complex ban tei ha ka 1.15 lak sq.m ka jaka, kan dei kaba la mang ïa ki Directorate ba 56 tylli ki Ophis, ki kamra ïa ki 4746 ngut ki nongtrei, artylli ki auditorium ba ngiam mar 200 ngut ki briew.
La ong ba ka jingbuh maw nongrim ïa ka Secretariat ba thymmai ha ka sngi rakhe ïa ka lyngkhuh dap 53 snem jong ka Jylla, ka pyni ïa ka jingkut jingmut jong ka Sorkar ban pyntyllun sted bad pynïaid shakhmat ïa ki jingtei bapher bapher hapoh ka Jylla.
Ha kaba ïadei bad kane haba ai jingkren, u Myntri Rangbah ka Jylla ula ong, “Kam dei satia tang ka building bad ka jingtei ka ban sa mih. Ka dei ka jingpynïar ïa ka Nongbah jong ka Shillong”.
Ha kaba ïadei bad kane jingpynwandur ïa kane ka Secretariat, u Conrad ula ong, “Kane kam dei ka video kaba la shna da ka AI. Kane ka dei ka jingpynwandur jong ka jingtei ba shisha kaban sa mih hangne, kaba la shimpor ïa ngi la palat shisnem ban pynkhreh,” ula ong.
Haba ñiew ïa ka Administrative bad Knowledge City ka ban mih ha New Shillong kum ka “Growth Centre” ka jaka pynroi, ula ong, “Haba ngi kynshew ha kane ka Secretariat, haba ngi kynshew ha kiba bun ki surok ba pynïasoh ïa ka Nongbah ba la don lypa bad kane ka Administrative City ba thymmai, ngi la buh ïa u maw nongrim na ka bynta ki shnong ki thaw, ki paidbah, ki trai jaka ha kumba 30 sqkm ba kin pynroi ïa kane ka New Shillong kum ka jaka ka roi ka san jong ka Jylla jong ngi”.
Shuh shuh na ka liang u MR u la pyntip ruh ba ka Sorkar ka la don jingthmu ruh ban kynshew haduh T.5500 klur ban pynroi ïa ka thaiñ New Shillong kynthup sa kumba T.10,000 klur ka jingkynshew kaba dang pynkhreh.
“Kane ka jingkynshew kan pynkylla dur nadong shadong ïa ka sor New Shillong,” ula ong haba bynrap ba ka Secretariat Building kan long kum ka nongwanrah jingkylla ban pynthikna ba ngin lah ban pyntyllun shakhmat ïa kane ka jingphohsniew jong ngi,”.
Haba kren ha ka jingïalang, u Bah Sniawbhalang Dhar ula ong ba kane ka jingtei ba thymmai ka dei kaba la buh nongrim ban pynkupbor ïa ka lawei jong ka Jylla.
Halor kane na ka liang jong u Bah Prestone Tynsong ula ong ba kane ka Secretariat ba thymmai ka dei kaba la angnud da u Myntri Rangbah Conrad K Sangma ban pynthikna ba ki jingshakri ka Sorkar bad ka synshar ka khadar kan ïaid beit ïaid ryntih noh na ka sor Shillong ba thymmai.
“Ngim ju mutdur ba ngin ïohi shisha ka jingtei ïa ka Secretariat ba thymmai hynrei u CM jong ngi um shym la kut tang ha ka jingphohsniew hynrei ula pynurlong shisha ban nang pyntyllun sted ïa ka jingkiew shaphrang bad ka roi ka par jong ka Jylla,” ong u Bah Prestone.
Ha kaba ïadei bad kane u Myntri Rangbah ula pyllait paidbah ruh ïa ka skhim ba kot T.63 klur na ka bynta ki 6000 ngut ki nongïoh jingmyntoi kiba dei na ka CM-ELEVATE, FOCUS, Green Meghalaya+, ki project kam jngohkai bad kiwei kiwei.