Ngim pyrshah ban shna skul, ngi pyrshah ïa ka jingai jaka ha Madan Umjar : Mawkynrew bad Mawleiñ

0

Shillong, K’lyngkot, 21: Ki nongshong shnong jong ka Mawkynrew bad Mawleiñ kiba don hapoh ka shatri jong ka ‘Sur Paidbah jong ki ar Dorbar Shnong’ ha ka sngi Baar ki la ong ba kin ym ailad ban bteng ïa ka jingshna ïa ka skul jong ka Ramakrishna Mission ha ka shnong Mawkynrew, East Khasi Hills tad haduh ban da ïapynbeit shwa ïa ka jingïakajia ïa ka jaka.
Kane ka jingdawa ka la wan hadien ba ka la mih ka jingïapynibor kaba lam sha ka jingmynsaw hynriew ngut ki briew kynthup saw ngut ki Pulit kynthei. Ka District Magistrate ka la pynjari da ka korphiw ban khanglad ïa kino kino ki jingjia kiba lah ban ktah ïa ka shongsuk shongsaiñ hapoh ka shnong.
Ki nongshong shnong ki la kynnoh ba u Acting Sordar bad ka kynhun jong u ki la aiti ïa ka jaka ha madan phutbol Umjar sha Ramakrishna Mission ban shna ïa ka ing skul watla ïa kane kajuh ka jaka ladep ban aiti sha ka Mawkynrew Sports Club.
Ha ka jingïakren bad ki lad pathai khubor, u Sordar barim jong ka shnong Mawlien u Bah Phrangstarwell Wankhar u la ong ba ki paidbah ka Mawkynrew bad Mawleiñ kim don ka jingpyrshah ïa ka jingshna ïa ka skul hynrei ki pyrshah ïa ka jingaiti ïa kajuh ka jaka ha madan Umjar namarba ladep aiti sha ka Mawkynrew Sports Cub.
U Bah Wankhar u la kynnoh ba u Acting Sordar uba mynta ryngkat bad ka kynhun jong u ki la ïaid lait ïa ki ar tylli ki dorbar shnong bad ïa ki paidbah da kaba aiti ïa ka jaka sha ka Ramakrishna Mission ban shna ïa ka skul.
“Ngi donkam ïa ka skul ban kyntiew ïa ka pule ka puthi ha ka thaiñ hynrei ha kajuh ka por ngi donkam ïa ka madan phutbol hynrei ka jingpyrshah ha kane ka kynti ïa ka jingshna da ka Ramakrishna Mission kam long pyrshah ïa ka pule puthi hynrei ka long pyrshah beit ïa ka jingpyndonkam bakla da u Acting Sordar bad ka kynhun jong u ïa ka iktiar ban aiti ïa ka jaka sha ki bor pynïaid skul khlem ka jingtip jong ki ar tylli ki Dorbar Shnong bad ki nongshong shnong,” la bynrap u Bah Wankhar.
U Bah Wankhar u la ong shuh shuh ba ka jaka ha madan Umjar ka dei jong ka Raid kaba kynthup ïa ka Mawkynrew bad Mawleiñ ïa kaba ladep aiti sha ka Mawkynrew Sports Cub ha u snem 2013 hynrei u Acting Sordar uba mynta u la ïaid lait ïa ki ar tylli ki Dorbar Shnong da kaba aiti biang ïa kajuh ka jaka sha ka Ramakrishna Mission.
Shuh shuh u la bynrap ba ka don ka sakhi sabut ba ka jaka ba la ai da u Acting Sordar sha ka Ramakrishna Mission kam dei satia ha madan Umjar hynrei ka jingtei ïa ka iing skul ba mynta ka la kyntur shaduh ka madan ïalehkai.

Leave A Reply

Your email address will not be published.