40 klur na ka bhah khajna dewïong pyllait ka Sorkar Jylla sha ka JHADC

Jowai, K’Lyngkot 21: Ka Sorkar Jylla ha ka sngi Baar ka la pyllait ïa ka bhah khajna na u dewïong ïa ka Jaintia Hils Autonomous District Council (JHADC) kaba kot T.40 klur.
Ïa kane ka khajna ba ka Sorkar Jylla ka la mang la aiti da ka Sanction Order da u Myntri Rangbah ka Jylla u Conrad K. Sangma ha u Chief Executive Member (CEM) ka Jaiñtia Hills Autonomous District Council (JHADC) Bah Thombor Shiwat ha ka jingleit iuhkjat ha ka sien banyngkong eh ha ka ophis treikam jong ka District council hadien ba la wai ka jingrakhe ïa ka Meghalaya Day kaba long ha District Library Auditorium, Jowai.
Ha kane ka sngi la ïadonlang ki ar ngut ki Symbud Nyntri Rangbah ba kynthup ïa u Bah Prestone Tynsong, u BVah Sniawbhalang Dhar, ki Myntri Sorkar ba kynthup ïa u Bah Comingone Ymbon, u AT Mondal, u MLA ka Jowai u Bah Wailadmiki Shylla nalor ki dkhot jong ka Executive Committee ka JHADC.
U Bah Shiwat u la pynpaw ka jingsngewnguh ïa u Myntri Rangbah uba la shimkhia ban pyllait ïa kane ka bhah khajna na ka bynta ba ka Council ba kan ïoh ban siew ïa ka tulop jong ki nongtrei kaba la kynjoh sha ka 12 bnai naduh u Lber 2024.
U la khublei ruh ïa ki ar ngut ki Symbud Myntri Rangbah bad u MLA kiba la shimkhia ban ïasaid na ka bynta ban pyllait ïa kane ka bhah khajna jong ka Council ban weng ïa ka jingeh jong nongtrei bad kumjuh ïa ki dkhot ka Council.