Sha sem Congress poi lut ki nongïalam ka UCPF ban kyrshan ïa u Bah MD Syiem na Umroi

0

Nongpoh, K’Lyngkot: Ki nongïalam bad ki dkhot jong ka Umroi Constituency Progressive Forum (UCPF), kiba la ïalam da u President jong ka, u Pynskhem Sohtun, ki la pynïasoh paidbah bad ka seng Congress ha ka jingïalang kaba la long mynta ka sngi ha ka Madan ïalehkai phutbol ka shnong Umroi.
Kane ka jingpynïasoh ka long ban kyrshan ïa u kyrtong jong ka Congress, u Micky Douglas Syiem, u ban ïakhun ïa ka elekshon MDC na ka Umroi Constituency.
Kum ban pynkynmaw, u Micky Douglas Syiem, uba la long mynshwa kum u Working President jong ka UCPF, u la pynïasoh shwa ïalade shimet sha ka seng Congress bad ba ka Congress ka la ai tiket ïa u kum u kyrtong ban ïakhun ha ka elekshon MDC na Umroi Constituency.
Ha kane ka jingïalang, ki nongïalam ka Congress bad ki nongïalam ka UCPF ki la wan ban pynïasoh mynta ka sngi sha ka seng Congress la don ryngkat ruh u Bah PN Syiem, Working President ka Meghalaya Pradesh Congress Committee (MPCC), u Bah M.G. Kharshanlor, President ka Ri-Bhoi District Congress Committee (RBDCC), u bah Stanlywiss Rymbai, adviser ka RBDCC, ki kyrtong jong ka Congress na Jirang, u Victor Rani, na Umsning, u Rocky A. Marweiñ, na Mawhati, u Dominic Mynsong, na Nongpoh, u Lawrence Nongrum bad kiwei kiwei nongkyrshan ka UCPF bad na ka party Congress.
Haba kren ha kane ka sngi, u Bah P.N Syiem kum u working President ka MPPC, u la ong ba kane ka election MDC ka dei ka election kaba kham pher bad kum ki paidbah ki dei ban sngewthuh ba ka jingjied ïa ki nongmihkhmat sha ka KHADC ka long ba kin long kita kiba don ka jingkitkhlieh na ka bynta ban thaw ïa ki aiñ kiba ai ka jingïada kaba kyrpang ïa ka jaid bynriew.
U la ong ruh dei ka party congress kaba la ai ka jingïada ne pynkupbor ba ngi la ioh ïa ka sixth schedule kaba ki kyndon jong ka, ka ai ïa ka jingïada kaba kyrpang ïa ki jaid bynriew Khasi jong ngi bad la jin ba ym dei ka party Congress kan nym don kata ka jingïada kyrpang ïa ka jaid bynriew rit paid jong ngi.
U la kren halor shibun ki kyndon kiba la pynkup bor ne ithuh da ka riti synshar ka ri bad khamtam ka jingai ïa ka sixth Schedule kaba ngi ioh ïa kata ka jingïada ïa ngi kum ka jaid bynriew ba rit paid bad ha kajuh por ruh u la kren halor shibun ki aiñ ba la wan rah da ka District Council ban ioh ïa ka jingithuh da ka aiñ kum ïa ka shongkha shongman, ban ïada ïa ka jinglong trai ïa ka khyndew ka shyiap, ïa ka jingithuh ïa ki kur ki jaid bad ruh kiwei kiwei kiba ngi donkam ban dang shna ïa ki aiñ kiba ngi dei ban ioh ïa kata ka jingïada kaba kyrpang.
Namar kata, u la kyrpad ruh ïa ki paidbah ka Umroi Constituency ba kin ai kata ka jingkyrshan kaba pura ïa u kyrtong ka Congress namar lada ka Congress ka ioh ban synshar ha KHADC kan dang lah ban thaw shibun ki aiñ kiba ai jingïada kumba la pynkup bor da ka riti synshar ka ri India, u la bynrap.

Leave A Reply

Your email address will not be published.