Jop ka Turshaphrang CC bad ka Youngstar ha ka SCA Cricket League Third Division

0

Shillong, Kyllalyngkot 22: Ka Turshaphrang CC bad ka Youngstar ki la ïoh ban khur jingjop ha ki ar tylli ki jingïalehkai ka lympung Shillong Cricket League Third Division 2024-25 ba la pynïaid da ka Shillong Cricket Association ryngkat ka jingïatreilang bad ka Samkhamti ha madan Urkaliar, Shillong.
Ka Turshaphrang CC ka la lah ban pynliem ïa ka United Mates da 62 ron, katba ka Youngstar ka la jop da 8 wiket ïa ka Nangkyntiew CC.
Ha ka jingïalehkai ba nyngkong ka United Mates ka la rai ban bol nyngkong hadien ba jop ïa ka toss, bad na ka liang jong ka Turshaphrang ka la lah ba kan kamai 206 ron haduh kaba kut jong ka 20 over bad khyllem tang 1 wiket.
Ar ngut ki nongtied jong ka Turshaphrang ki la lah ban kynjoh palat ïa ka half centuri (50 ron tam), ha kaba u Rudolf Syiemiong u la duna tang 5 ron ban kynjoh ïa ka spah ron da kaba kamai 95 ron naki 56 bol, nangta u Raimonlang Mawthoh u la tied 86 ron naki 54 bol.
U tei u wiket ba la shah pynhap u dei ba la khur da u Rupam Das (3 over: shah tied 27 ron: khur 1wiket).
Haba pyrshang jubab ïa ka thong ba la buh ka United Mates ka la lah ba kan tied tang 144 ron haduh kaba kut jong ka 20 over ba la mang, bad khyllem 8 wiket. Na ka liang jong u Vishal Deb u la kamai 44 ron naki 21 bol, nangta u Partha paul u la ïarap 35 ron naki 37 bol, hynrei kam shym la biang naba ka kynhun ka dang sahdien haduh 62 ron ban kynjoh ïa ka thong.
U Erich m Lyngdoh u la ïoh ban khur 2 wiket naki 4 over bad shah tied 17 ron, hynrei ka namtam ka la leit sha u Rudolf Syiemiong, u ba la tyngshaiñ ha ka tied da kaba kamai 95 ron bad khur ruh 1 wiket ha ka bol ban khur syndon ïa ka khusnam Player of the match.
Ha ka jingïalehkai kaba bud, ka Young Star ka la jied ban bol nyngkong hadien ba jop ïa ka toss. Haba shimti ban tied nyngkong ka Nangkyntiew CC ka la ïohlad ban kamai tang 64 ron naba shah pynkhyllem baroh 10 wiket tang hadien 18.1 over.
Napdeng ki nongtied kiba la kamai kham bun ron ïa ka kynhun ki long u Edmund Sawian (22 ron naki 24 bol) bad u Rinaldo Sawian (19 ron naki 31 bol). Na ka liang ki rangkawangbol u Aditya Paul u la khur haduh 4 wiket naki 3.1 over bad shah tied tang 8 ron, katba u Asik Alam u la khur 2 wiket naki 4 over bad shah tied 12 ron. Haba jubab, ka la bampor tang 5.5 over ïa ka Youngstar ban kynjoh 67 ron bad khyllem tang 2 ngut ki nongtied. Baroh ar wiket la khur da u Cassius Dkhar (3 over: shah tied 34 ron).
U Md.wahid u la kamai 28 ron naki 18 bol, nangta u Asif ali u la kamai 26 ron naki 13 bol kaba la biang ïa ka Youngstar ban khur ïa ka jingjop da 8 wiket. Ka nam Player of the match la khur da u Aditya Paul u ba la khur haduh 4 wiket.

Leave A Reply

Your email address will not be published.