Plie paidbah u MR ka Jylla ïa ka Indoor Sports Hall ha Lummawbah

Shillong, Kyllalyngkot 22: U Myntri Rangbah ka Jylla – Conrad K Sangma, ha ka 22 tarik Kyllalyngkot, 2025 (sngi Balang), u la plie paidbah ïa ka ‘Indoor Sports Hall, Lummawbah ha ka jingïalang ba la pynlong da ka Dorbar Shnong Lummawbah ha ryngkat bad ka Lummawbah Sports & Cultural Club.
Ha kane ka sngi la ïadon ryngkatlang u Bah Hamletson Dohling – Adviser jong u Myntri Rangbah. ïa kane ka Indoor Sports Hall la shna ha ka jinglut kaba kot 1.55 klur.
Haba ai ka jingkren, u Myntri Rangbah ka Jylla u la pynpaw ïa ka jingkmen bad jingsngewhun ban plie ïa kane ka Indoor Sports Hall bad ïaroh ïa u Bah Hamletson Dohling bad ka Dorbar Shnong kiba la trei shitom na bynta ban pyndep ïa kane ka jingtei ïalehkai.
“Nga la kmen bha ban ïohi ïa kane mynta ka sngi, ka imlang ka sahlang, ki nomngïalam saiñ pyrthei bad ka Sorkar ka ïatreilang kum kawei na bynta ban kyntiew ïa ki jaka jong ngi, ka imlang sahlang bad ka jylla hi baroh kawei,” la ong u Myntri Rangbah ka jylla.
U la pyntip shuh shuh ba ka sorkar ka ngeit ha ka jingïatreilang bad ka imlang sahlang da kaba burom ïa ka kolshor, ka dustur bad ki rukom treikam dei na kata ka daw ba baroh ki prokram bad ki polisi jong ka sorkar ki pynksan ïa ka jingïashim bynta lang jong ki paidbah.
U Myntri Rangbah u la pynthikna ïa ka jingkyrshan ban pynlong ïa ka Lummawbah Indoor Sports Hall kum kawei na ki jaka kaba ïai treikam (active zone) ha kaba ki samla kin lah ban ïashim bynta bad kiew shaphrang ha ki jingïalehkai bapher bapher.
“Ha kine ki 7 snem ba ladep ka tnad Sports bad ka jingtei ïa ki jaka ïalehkai ka la wanrah ïa ka jingkylla kaba khraw ban plielad ïa ki khynnah samla ban bteng ïa ki sap jong ki,” u la ong.
Haba kren halor ka jingpynlong ïa ka Meghalaya Games man la u snem bad ha ki bynta bapher bapher jong ka jylla, u la pynpaw ba ki jingïalehkai ka wanrah ïa ka jingïadei, ka jingïajan bad ka jingïatylli. U la bynrap ruh ba ha kane ka juk mynta ki don shibun ki jingpynthut bad ki jingïalehkai (sports), ka put ka tem (music & art) ki pynlong ïa ki ban ïatreilang ha ka rukom kaba tei.
“Ka pisa ba la pynlut ha ka Sports kam dei ka jingpynlut hynrei ka jingbei tyngka na bynta ki samla jong ngi bad kam dei tang ka jingïashimbynta ha ki jingïalehkai hynrei ka dor bad ka jinglong ryntih kaba phi donkam ban pynrung ban long u nongïalehkai uba bha,” u la ong.
“Halor ki jingdawa na ki nongmihkhmat jong ka thaiñ na ka bynta ban pynbha ïa ka thaiñ bad ki jaka ba marjan u Myntri Rangbah u la pynthikna ba yn sa peit bñiah ïa ki jingdawa, “Nga la shimkhia ïa baroh ki jingdonkam bad ki jingdawa bad da ka jingïasyllok lang bad ka Dorbar Shnong ngin sa shim ïa kiba kongsan ban buh hakhmat eh,” ong u Myntri Rangbah. U la pynthikna ruh ban tuklar halor ka jingtyrwa jong ka Dorbar Shnong sha ka tnad Tribal Affairs jong ka Sorkar India ban shna ïa ka Auditorium na ka bynta ka arts & culture.