OC Blue SPL 2024: Watla ïoh hat trik u Alem mad namrem ka Nongrim Hills ha ka Langsning

Shillong, Kyllalyngkot 22: Ka Langsning FC ka la lah ban pynkut noh ïa ka jingshah rem kaba lai sien lynter da kaba pynliem ïa ka Nongrim Hills SC da 4-3 kol. Ha kane ka jingïalehkai ba sdang ïa ka 2nd Leg jong ka lympung OC Blue Shillong Premier League 2024 ha madan First Ground-SSA Stadium, Polo, la sakhi ïa ka Langsning kaba la ïakhun dohïap ban wanphai hadien ba shah lamkhmat shuwa ba kan khur ïa ka jingjop.
Ka Nongrim ka la ïoh ban lamkhmat nyngkong shuwa ba ka Langsning kan wanphai lyngba ki kol na u Mecheal Roy Kurbah (38’), Daohipaia Rymbai (56’, 66’) bad u Laldanmawia (86’P). Ka jingïaroh ba kyrpang ha kane ka jingïalehkai ka long sha u Alem Khongwir (25’, 82’, 90’+1) jong ka Nongrim Hills, watla ka kynhun ka la mad ïa ka namrem hynrei u la ïoh ban pynkhihjar ïa lai tylli ki kol.
Lah ban kdew, kane ka dei ka jingkylla na ka jingïakhun 1st Leg jong kine ki arliang – ha kaba ha kane ka jingïalehkai ka Nongrim Hills ka la wanphai kylla ban jop da 4-3 ha ka 6 tarik u Nohprah.
Ha kawei ka liang, ka la long kumjuh ïa ka Rangdajied United FC bad ka Nangkiew Irat SC, kiba la ïakhaid khlem don ba lah pynkhihjar (0-0). Haba phaidien, ka jingïakhun 1st leg ha ka 7 tarik Kyllalyngkot ruh ka la kut ha ka jingïakhaid.
Kane ka namjop ka la kyntiew ïa ka Langsning ban ïoh 10 point, hynrei kam shym la don kano kano ka jingkylla ha kaba ïadei bad ka kyrdan ha ka miej; ka dang ïaineh ha ka kyrdan ba 8 bad ka Rangdajied (20 point) ruh ka dang neh ha ka kyrdan ba lai. Na ka liang jong ka Nangkiew Irat bad ka Nongrim Hills baroh ar ki la kamai 13 point shuwa kane hynrei ka Nangkiew Irat ka la ïoh ban kiew sha ka kyrdan ba 4 hadien ba ïakhaid, kaba la pynlong ïa ka Nangkiew Irat ban hiar sha ka kyrdan ba san.
Shuwa kane, ka Rangdajied ka la ïoh ïa ka kabu ba paka ban khur ïa ka jingjop na ka penalty pyrshah ïa ka Nangkiew Irat. Hynrei u Arlangky Nongsiej u khlem shym la lah ban pynurlong.
Mynta ka sngi kan don tang kawei ka jingïalehkai, hapdeng ka Laitkor SC bad ka Nongthymmai SC ha ka por 2 shiteng mynsngi. Haba phaidien, ka Nongthymmai ka la pynliem ïa ka Laitkor da 3-1 kol ha ka 1st Leg.