Shillong, Nohprah 05: U Myntri Rangbah ka jylla u Conrad K Sangma mynta ka sngi Ba-ar, ula ong ba ka jingshim rai jong ka sorkar ban pyndonkam noh da ki kot skul NCERT ka long ban ïarap ïa ki khynnah skul ba kin lah ban ïakhun ha ka National Level.
U Sangma ula kren ïa katei haba pynshai halor ka jingkynthoh jong u nongïalam ka TMC bad u Myntri Rangbah barim ka jylla Dr Mukul Sangma da kaba ong ba ka sorkar kam dei ban pyndonkam da ki kot skul NCERT bad ka jingshim rai ka long kaba bakla jur.
“Peit ka NCERT ka dei kaba la bud namar kiba bun kiei kiei ki ban don ha ka haba phai sha ki sobjek kum ka Mathematics, Science bad kiwei dei ki sobjek. Ngam don eiei ban kren pyrshah ïa ka jingkren jong uwei pat u nongïalam hynrei ka sorkar bad ka tnad ki la shim ïa ka rai namar kaba nyngkong eh, ka long ba ngi sngew ba ki khynnah ki donkam ban ïakhun ha ka National Level bad kumta ki don ki bynta kiba la jia hapoh ka jylla ka long ba ïa ki kot kiba dei naka bynta ka klass VI ne VII la hikai pat ha Meghalaya na ka bynta kiba shong ha ka klass VIII ne IX katba ha ka NCERT la hikai ha ka VI,” ula ong.
Ula ong ba ki don ki bynta ha kaba ïadei bad ka National Level, haba la pynlong ïa ka jingkhmih bniah, ki kyndon jong ka NCERT ki long ki bynta kiba kongsan bha ha ki katto katne ki bynta.
“Ka bynta kaba kongsan tam ka long, lehse ka lah ban long u ‘dkhot’ um shym la sngewthuh ne ym sngewthuh ïa kaei kaba ngi pyrshang ban leh ban shim ne pyndonkam ïa ka Syllabus na ka bynta ka jingdonkam ka jong ngi. Kumta ngin sa lah ban ïakhun ha ka National Level bad ki Course kin long kiba rytih lang. Ngin lah ruh ban don ïa ka rukom treikam ka ban long kaba bha shuh shuh bad haba donkam ngin hap ban shim ïa katei. Ngin sa pyndonkam ïa katei da kaba ïaid ruh katkum ka kolshor, histori bad ka jinglong jingman hangne bad ngin sa pynthikna ïa ka Syllabus kaba pher na ka bynta ki sobjek bapher bapher,” ula ong.
