Pynkynmaw biang ka sorkar sha Delhi da ka shithi ban ithuh noh mardor ïa ka ktien Khasi bad Garo

Shillong, Nohprah 05 : U Myntri Rangbah ka Jylla u Conrad K Sangma ha ka sngi Ba-ar, ula pyntip ba ka Sorkar Jylla ka la dep thoh shithi pynkynmaw sha ka Sorkar Pdeng ba kan pynrung noh mardor ïa ka ktien Khasi bad Garo ha ka Khyrnit ba Phra jong ka Riti Synshar ka Ri.
Haba ïakren bad ki Nongthoh khubor, u Conrad ula ong ba ka shithi ba khatduh ba la phah da ka Sorkar Jylla ka dei ha u bnai Naiwieng hadien ka jingïalang bad ka Khasi Author Society (KAS).
“Ha ka jingshisha, hadien ba la mynjur ïa ka Resolution, la bunsien nga la thoh sha ka Sorkar India ban pynrung noh ïa ka ktien Khasi bad Garo ha ka Khyrnit ba Phra” ong u Conrad.
“Hadien ba ka KAS ka la ïakynduh ïa nga dang shen, tang ha ka taiew ba nyngkong hi,nga la thoh shithi sha ka Home Ministry ba pynkynmaw biang ïa ki.Kumta mano mano ba kynthoh, ki dei ban wad bad kylli na ngi shuwa ban shu kynnoh hi kumto khlem nongrim namar ka pyni da kumwei pat sha ka pyrthei” ula bynrap.