Shillong, Nohprah 05 : U Myntri Rangbah ka Jylla Conrad u K Sangma ha ka sngi Ba-ar, ula pyntip ba ka Sorkar Jylla ka la pynkylla ïa ka rukom treikam ka Meghalaya Public Service Commission (MPSC) da kaba thung pynbun ïa ki Recruitment Board ban pynsted ïa ka rukom thungkam.
Haba iakren bad ki nongthoh khubor, u Conrad ula ong “Ngi la pynkylla ïa ka rukom treikam ka MPSC bad ka rukom thungkam baroh kawei da kaba pynkha kham bun ki Board. Kane kan pynkloi ïa ka rukom thungkam”.
“Ha ka por ba mih ka Health Recruitment Board, ka jingthungkam ïa ki doktor kaba la sahteng haduh 5 snem, la lah ban pyndep tang 3 bnai da ka jingpynkha ïa kane ka Board ba thymmai” ula bynrap.
U Conrad ula ong ba ka jingthmu hi ka long ban pynthikna ba ka rukom thung kam thung jam kan ïaid beit ïaid ryntih bad kan kloi ruh.
“Khnang ban pynthikna ba ki jingthung kam kin ïaid beit ïaid ryntih, ka jingpynkha ïa ki Board bapher bapher kan ailad ban pyntreikam bad thungkam mar mar bad kaei kaba ngi leh mynta ka dei shibynta jong ka jingpynkylla” ong u Conrad.
U Myntri Rangbah ula ong “Ki don ruh ki skul Sorkar, ki Higher Secondary School kiba hap ban thung ïa ki Principal bad ka kam ka la sahteng lah san snem bad ka MPSC ka la hap ban kit ïa ka lyngkor ba khia bad khnang ban pynthikna ba kam dei ban slem ka jingthung kam, ngi la sdang ban thung ïa ki board ba thymmai ban pynkylla ïa ka rukom thung kam”.
