Pynkhreh ka Sorkar ban kyntiew ïa ka mang tyngka 15 % haduh 20 % ïa ka tnad ba peit ïa ka Rep

Shillong, Nohprah 05: U Symbud Myntri Rangbah ka jylla u Bah Prestone Tynsong mynta ka sngi ula pyntip ba ka sorkar ka la pynkhreh ban kyntiew kumba 15% haduh 20% ïa ka mang tyngka ïa ka tnad ba peit ïa ka rep ka riang na ka bynta une u snem ban wan, khnang ban kyntiew ïa ka kam rep kam riang hapoh ka jylla.
“Ha u 2023-24 na ka ka mang tyngka ba 900 Klur tyngka, ngi la kyntiew sha ka T.1194 Klur bad ha ka mang tyngka ka ban sa wan, ngi kwah ban dang kyntiew shuh shuh sa 15% haduh 20% bad nga ngeit skhem ba kane kan ïarap shibun ban kyntiew ïa ka rep ka riang hapoh ka jylla” ong u Symbud Myntri Rangbah haba kren ha ka jingïalang pynhap pyrda ïa ka Meghalaya Farmers Parliament kaba lai, kaba la long ha State Convention Center, Shillong.
U Bah Prestone ula ong, “Ki ri kiba don hapoh ka dewbah Europe, ki briew kiba riewspah tam ki dei ki nongrep bad kane ka ai mynsiem ïa ngi ki nong Meghalaya ba ki nongrep ki dei u budlum jong ka ïoh ka kot jong ka jylla jong ngi bad jong ka pyrthei baroh kawei bad ngi donkam ban pynlut por kham bun bad ban kyntiew ïa ka bhah mang tyngka ha ka liang ka rep ka riang”.
U Bah Prestone ula ong, ba ha ka Farmers Parliament la mynjur ïa ka Resolution bad ïa kane ka rai la shim hadien ba la dep ban ïatai sani hapdeng ki nongrep bad ki ophisar ka sorkar jylla bad ka sorkar jylla kan sa shimkhia bha ïa kane ka Resolution.
U Symbud Myntri Rangbah ula kren ruh ha kaba ïadei bad ka jingeh ki nongrep kaba ki mad na ka jingshah ot kilo ki mar rep haba ki leit die ha ïewduh ne kiwei kiwei ki ïew.
“La bun tylli ki snem, ngi la ïakren shaphang ka jingshah ot kilo ki mar rep ha ïewduh ne ha kiwei kiwei ki ïew bad na ka liang jong ka District Council ki la phah ïa ka jingpynkylla ha kaba ïadei bad ka Establishment, Management and Control of Market Amendment Regulation Act 2021 bad u Lat ka jylla ula ai ia ka jingmynjur ïa kane. Ngi la ai ka jingbthah ïa ka District Council ba kan bthah ïa ki Market Committee bapher bapher. Ka ïew ka hat ka dei ka sobjek kaba hap hapoh ka jingkhmih jong ka District Council hynrei don ki briew kiba kynnoh beit ïa ka sorkar khlem da tip ïa ka sobjek Market ka dei jong ka District Council”.
“Nga la ai ïa ka jingbthah sha baroh 3 tylli ki District Council jong ka jylla ba kin pynmih ïa ka Regulation kaba khlaiñ kat kum ka jingmynjur jong u Lat ka jylla bad ka sorkar jylla ban pyntreikam ïa ka ha kawei pa kawei ka Market Committee bad kawei na ka kyndon ka long bym dei ban khate lane ban ot kilo ïa ki mar rep mar riang na ki nongrep. Nga pynthikna ha phi ba watla kam dei ka sobjek jong ka sorkar jylla hynrei ngin bud dien bad ngin sa phah ruh ïa ki jingbthah bad notis sha ki bor pynïaid district ba kin buddien lem ia kane ka kam khnang ba ki nongrep kin ia bit kinia biang” ong u Symbud Myntri Rangbah.
Ha kane ka jingpynhap pyrda ïa kane ka jingïalang jong ka Farmers Parliament la ïadon lang u MLA ka Mawkynrew u Bah Banteidor Lyngdoh uba long u Myntri sorkar barim ka jylla uba khmih ïa ka rep ka riang bad uba dei pat mynta u Adviser jong kane kajuh ka tnad , ki nongïalam ka Hills Farmers Union, ki ophisar sorkar bad ki nongrep kiba na ka kylleng ki bynta jong ka jylla Meghalaya.