Shillong, Rymphang 19: U Symbud Myntri Rangbah ka Jylla Bah Prestone Tynsong ula ong ba ka jingthungkam ïa ki briew bala shemphang ïa ki kam (experience) kam dei satia ka jingpynlutksan jong ka Sorkar Jylla.
“Haba phai sha ka jingthung ïa ki briew ba shemphang kum ki Nongaibuit, ka dei ka kam kaba pynmyntoi bha ïa ka Sorkar MDA hapoh ka jingïalam u Conrad K Sangma” ong u Bah Prestone haba ïakren bad ki nongthoh khubor.
U Symbud Myntri Rangbah ula kynthoh ïa kane halor ka jingkynnoh jong u President ka Voice of the Peoples party (VPP) Bah Ardent Basaiawmoit ba ka Sorkar Jylla kala shu ïaid thungkam pathar watla ka Jylla ka don hapdeng ka jingkyrduh pisa.
U Bah Ardent ula buh jingkylli halor ka jingthung haduh san ngut ki Nongaibuit ïa u Myntri Rangbah ka Jylla bad ka jingthung ïa u Director General of Police (DGP) barim u R Chandranathan kum u Security Adviser.
Hynrei u Bah Prestone ula ong ba ka Sorkar kala lah ban shim ïa ki rai ba kongsan ha kiba bun ki kam (issue) namar ka jingdon jong kine ki nongaibuit.
“Ban shu kynoh ba ngi pynlutphut tang namar kine ki briew, ka long kaba bakla palat. Ha ka jingshisha, ka jing siew kaba rit bha ngi la ai sha ki” ula bynrap.
U Symbud Myntri Rangbah ula pynshai ruh ba u DGP barim kum u Security Adviser ka long halor ka nongrim ba un hap ban shim ïa ka lyngkor ban buddien ïa ki jingtyrwa bad long u ksai ban pyniajan ïa ka jingtreikam hapdeng ka Sorkar Jylla bad ka Ministry of Home Affairs (MHA).
“Kane ka dei kaei kaei kaba ngi la leh bad ngim shym la shu pynlutkai ïa ka pisa hynrei haba ngi aikam ïa uno uno u briew, ngi da kheiñ da diah khnang ba ka Sorkar kan lah ban treikam bha. Lada ka Sorkar ka lah ban treikam bha, ka jingmyntoi hi ka leit sha ka Jylla baroh kawei” ula ong.