Pynkhreh ka Israel ban pynrung kam kumba 1 lak ki nong India

Jerusalem, Naiwieng 07: Ka thma hapdeng ka Israel bad ki Hamas, ka lah ban plie lad pynban ïa ki kam bylla na ka bynta ki nong India.
Katkum ki khubor kiba la paw ha Israel la ong ba kane ka jingwad nongbylla ka Isreal na India kadei hadien ba kumba 90 hajar ngut ki nongbylla kiba dei ki nong Gaza, ki la hap ban leit phai noh sha la ka ri, hadien ba ka Isreal ka la pynkut noh ïa ka Work Permit jong ki nong Gaza hadien ba la khie ka thma hapdeng ka Israel bad ki Hamas kiba synshar ïa ka Gaza.
Ka jingïadei hapdeng ka Israel bad ka India ka la khambha ha kine ki snem baladep, khamtam hadien ka jingshimti u Narendra Modi kum u Myntri Rangbah Duh ka ri India. Dang shen ha ka jingïalang jong ka UNO ruh, ka India kam shym la ïashim bynta ha ka Resolution kaba dawa ba ka Israel kan pynkut ïa ka thma pyrshah ïa ki Hamas ha Gaza.
Nangta ka India bad ka Israel ruh ki la nang ïajan ha ka jingtreikam ha ka liang ka khaïi ka pateng bad khamtam eh ha ka liang ki kam pynroi. Lyngba kane ka jingaikam ïa ki 1 lak ngut ki nong India la ngeit ba kan nang pynskhem shuh shuh ïa ka jingïadei paralok bad ka jingïadei kaba jan bad ki nong India kiba shong ba sah ha Israel.
Lah ban kdew hangne ba ha ka thma hapdeng ka Isreal bad ki Hamas kaba la dap shi bnai thik mynta ka sngi, ka la pynlong ïa kiba bun ki nongbylla ban phet noh shuwa na Israel. Kane ka jingpynkut noh ka Israel ïa ka jingai jingbit ban wan bylla ki nong Gaza ha Israel ka la plie lad pynban ïa ki nong India, ong ki tyllong khubor.