Shillong, Naiwieng 07: Bun ngut ki nongïalam barim jong ka Seng Peoples Democratic Front (PDF) mynta ki la khreh ban mih noh na ka NPP bad ban pynkhie im biang ïa ka Party.
Ki katto katne ki nongïalam kiba kynthup bun ki dkhot ka CEC, kiba ym treh ban pynpaw kyrteng, ki la ong ba ka la don ka jingïaphylliew jingmut hapdeng ki para dkhot ka CEC kiba la leit rung ryngkat bad ki arngut ki MLA sha ka Seng NPP ba ki kwah ban mih noh na ka NPP bad ban pynkhie im biang sa shisien ïa ka PDF, ka Party kaba la jop saw ngut ki MLA ha ka elekshon MLA 2018 bad ruh ha ka elekshon MDC 2019.
Kine kiba thmu ban pynkhie im ïa ka Party, kim shym la ïathuh ïa ka daw ba thikna, hynrei la antad ba dei ka jingshah shet ha ki nongïalam ba kham hakhmat jong ki ha ka por ba ki leit rung lang sha ka NPP ban don lang ruh ha ka sorkar, pynban ki jingkular kim shym la urlong kumba ki la khmih lynti ha ka por ba ki khylliap lama ïa ka PDF ban rung sha ka NPP hadien ka elekshon MLA mynta u snem 2023.
Lah ban kdew hangne ba ïa ka PDF la seng ha shuwa ka elekshon MLA jong u snem 2018 da u Bah Pynshngaiñ N. Syiem ryngkat kiwei kiwei de ki riew rangbah. Hynrei ha ka elekshon ha katei ka snem, u Bah Pynshngaiñ u la rem noh bad la jop tang u Bah Banteidor Lyngdoh na Mawkynrew, u Bah Hamlet Dohling na Mylliem, u Bah Gavin Mylliem na Sohra bad u Bah Jason Sawkmie na Umsning. Ka PDF ka la pynïasoh sha ka sorkar MDA -I bad u Bah Hamlet bad Bah Banteidor ki la ioh rung ha ka kynhun Myntri baroh san snem.
Hadien kane ka la jop ruh katto katne ngut ki MDC ha KHADC. Hynrei hadien pat u Bah PN Syiem, uba long u nongseng jong ka Party u la shah weng noh na ka kam President bad shah weng ruh syndon na ka Seng.
Ha ka elekshon MLA 2023, u Bah Hamlet bad u Bah Jason ki la ïakhun noh na ka NPP bad ki la rem noh ha ka elekshon. La jop satang u Bah Banteidor bad u Bah Gavin bad wat lada kila kyrshan ia ka sorkar MDA-2, pynban kim shym la ïoh rung ha ka kynhun Myntri. Tang khyndiat bnai hadien kane, ki la rai ban pynïasoh noh sha ka NPP baroh arngut ki MLA ryngkat ki nongïalam, kiba bun na ki, ki la thmu ban mih noh na ka NPP bad ban pynim biang ïa ka PDF kumba la ong shakhmat.
