Pynkhreh ka Israel ban khyrwit kham tyngeh ïa ka Gaza nangne shakhmat

Jerusalem, Risaw 22 : Ki shipai jong ka Israel, ka Israel Defence Forces ki la byrngem ban khyrwit kham tyngeh ïa ka ktem jong ki Hamas ha Gaza hangne shakhmat.
Kum ka dak ba ki bor shipai ki la pynkhreh na bynta ka kylla kaba ar jong ka jingïakhun ban khyrwit ïa ka Gaza, u nongai ktien ka IDF u Daniel Hagari u la ong, “Ngi hap ban jam pat sha ka bynta kaba bud jong ka jingïakhun thma ym kumba ong kiwei. Naduh mynta ka sngi ngi la nang pynjur ka jingïakhun.”
Shuh shuh na ka liang jong u Chief of Staff ka IDF, u Herzi Halevi pat u la ong ba ki bor shipai ryngkew ki dei ban long kiba la pynkhreh ban kynduh ïa kano kano ka jingïakhun haba ki leit ban rung sha ka Gaza Strip.
“Ngin sa rung sha ka Gaza Strip, ngin sdang ïa ka jingïakhun thma ha ka rukom kaba janai bha ban pynjot thiaw ïa ka jingthmu jong ki Hamas, ïa ka jingtreikam jong ki bad ngin buh ruh hakhmat ïa kaei kaba la jia bad khyllem ha ki ar taiew mynshwa,”u la ong.
Katei ka jingkren jong u ka long halor ka jinghiar thma kynsan ki lehnoh Hamas ïa ka Israel ha ka 07tarik mynta u bnai kaba la wanrah ïa ka jingïap jong kumba 1,400 ngut ki briew. Hadien kane ka Israel ka la sdang ban pynphai kylla bad khyrwit tyngeh ïa ki jaka riehtngen jong kitei ki lehnoh kiba la synshar ïa ka Gaza naduh u snem 2007.
U la ong ruh ba ka Gaza kadei kaba jyrwit jyrwat bha bad ki nongshun ki la pynkhreh bha ban aireng pyrshah hynrei ki shipai Israel ki la pynkhreh kham bha shuh shuh.
Dang ha kane ka taiew u Myntri ka tnad Ïada Ri ka Israel u Youv Gallant u la ong ba ka Israel ka la pynkhreh mynta ban pynkylla ïa ka jinglong jingma ha Gaza kaba kdew ba ki kwah ban pynduhbor noh ïa ka Hamas bad pynpaw ruh ba ïa katei ka kam kin ïaid ha ki lai kylla.
Na ka liang ka IDF ka don ha ka kylla kaba nyngkong ha ka por ba ki siat na suin. Na ka liang ka Israel ka la pynkhreh bad lum thup ïa ki hajar bad hajar ngut ki shipai ban pynkhreh na bynta katei ka jinghiar thma ha ka kylla kaba bud.
La kam ruh ba ki la don kumba 1400 ngut ki briew kiba la duhei ïa ka jingim na ka jingshah hiar thma ha ki Hamas dang shen ha Israel bad kumba 210 ngut kiwei pat ki la shah rahbor. Shuh shuh la kam ruh ba ki don pat kumba 4385 ngut ki Palestine kiba la suba ba ki ïap ha Gaza ha ka jingkhyrwit kylla ki shipai Israel.