New Delhi, Risaw 22 : Ka India ka la phah haduh 38 ton ki lad jingïarap na bynta ki lanot thma ha Palestine kiba kynthup naduh ki dawai, ki tiar sumar bad kiwei kiwei na bynta ki nongshong shnong kiba im ha Gaza hapdeng ka thma.
Ïa kitei ki song jingïarap ka India ka la phah lyngba ka liengsuiñ C-17 jong ka Indian Air Force kaban leit pynhap ïa kitei ki jingïarap lyngba ka El-Arish airport ha Egypt.
Kumba long mynta, bun bha ki kynhun ai jingïarap na kylleng ki ri ka pyrthei ki la phaikhmat lang sha Gaza bad ong ba ka jinglong jingman ha Gaza ruh ka long kaba i sangsot bha. Na ka liang ki shipai Israel khlem sangeh ki la bteng ban khyrwit na suin ïa ka Gaza hadien ba katei ka ri ka la shah hiar thma kynsan ha ka 07tarik Risaw ha ki Hamas.
Na ka liang u Myntri ka tnad Kam Bari, u Arindam Bagchi u la ong ba ïa kitei ki jingïarap kin aiti sha ka Egyptian Red Crescent na ka bynta ban pynpoi pat sha Palestine.
“Ka India ka la phah ïa ki lad jingïarap sha ki paidbah ka Palestine lyngba ka liengsuiñ IAF C-17 kaba kit kumba 6.5 ton ki tiar jingsumar bad 32 ton pat ki lad jingïarap na bynta ki paidbah ka Palestine lyngba ka kad liengsuin El-Arish ha Egypt,” ong u Bagchi lyngba ka ‘X’.
Shuh shuh u la ong ba kitei ki tiar jingïarap ki kynthup naduh ki dawai ban ïada ïa ka jingim, ki tiar puid, ki dara, ki song jingthiah, ki tyrpa, ki tiar kynthei, ki tiar jiar um bad kiwei kiwei.
Hadien kane, u Myntri u la ong ruh ba u Nongkit ‘tien Syiem jong ka India ha Egypt u Ajit Gupte u la aiti ïa kitei ki song jingïarap sha ka Egyptian Red Crescent ban phah pat ïa ki sha Palestine.
Katei ka jingphah jong ka India ïa ka song jingïarap sha Palestine kadei hadien lai sngi ba u Myntri Rangbahduh ka Ri u Narendra Modi u la phah ïa ka jingsngewlem sha u President ka Palestine, u Mahmoud Abbas halor ka jingïap ki riew paidbah ha ka hospital ha Gaza bad banjur ba ka India ka ieng skhem ha ka nongrim halor katei ka ishu Israel – Palestine.
Ka World Food Programme (WFP) bad ka World Health Organization (WHO) ki dei ki katto katne ki agency kiba la jer ïa ka jingjia ha Gaza kum kata ka jaka ba la i shyrkhei bha.
Ka India ka la kyrshan ïa ka Palestine bad ki phetwir Palestine lyngba ka jingnoh jingïarap sha ka UN Relief and Works Agency (UNRWA).
