Jowai, Risaw 22: Ki nongïalam ka Jaiñtia Student Union (JSU) Khliehriat Circle ki la ïakynduh ïa u Myntri ka Sorkar Jylla uba peit ia ka tnat Social Welfare u Bah Paul Lyngdoh ryngkat ka jingdonlang jong u MLA ka Khliehriat Constituency Bah Kyrmen Shylla uba long ruh u Myntri ka Sorkar Jylla.
Ki nongïalam ka seng ki la ïohlad ban ïa kynduh ïa u Bah Paul Lyngdoh ha ka sngi ba u leit ban plie paidbah ïa ka jingkieng ïaid kjat ha ka shnong Sahksaw bad ka seng ki la ai da ka dorkhas ha u Bah Paul da kaba ai jingmut sha ka Sorkar ban ai bhah bad bynta lem ïa ka East Jaiñtia ban ïoh shna ïa ka Rehabilitation Centre ban sumar ïa kiba kyrni ha u drok namar ka East Jaiñtia Hills District ka dei kawei na ki jaka ba kham kynrei kiba ïa u dih drok.
La pynsngew ba ka dei ruh ka East Jaiñti Hills District kaba jur ka jingrung jingmih u drok shapoh ka jylla Meghalaya. Ka seng ka la pynsngew ba ka East Jaiñtia Hills ka dei hok ban ïoh ïa kane ka shlem jingsumar ïa kiba kyrni ha u drok khamtam ïa ki khun samla ka thaiñ ba kin lait na u jingdih pynbuaid uba ïalam bakla ha ka jingim jong ki.
Na liang jong u Myntri ka Sorkar ka tnat Social Welfare u la shimkhia ïa kane ka jingai jingmut ka seng bad u la bthah ïa ki bor peit bor khmih ban wad ïa ka jaka kaba biang paka ban ïoh buh kum kane ka shlem hapoh ka thaiñ.
