Khliehriat, Nohprah, 15: Ki nongïalam bad ki dkhot jong ka Federation of Khasi Jaiñtia & Garo People (FKJGP) na Shillong bad na East Jaiñtia Hills District Khliehriat ha ka sngi Thohdieng jong ka taiew ba ladep ki la hiar sha ka shnong Lama kaba hap hapoh Elaka Lakadong, East Jaiñtia Hills District ban pynskhem ïa ki nongkitkam ba thymmai jong ka FKJGP-South East Border Area (SEBA) Circle.
U Vice President jong ka FKJGP-Central Executive Committee u Bah Kitboklang Nongphlang uba la long kum u kongsan ha kane ka sngi bad u la pynskhem ïa ki nongkitkam bad ïa ki dkhot ba thymmai jong ka Circle.
Haba kren kum u kongsan, u Bah Nongphlang u la pynsngew ba ka FKJGP ka ieng ha ka nongrim kaba skhem ban ïada ïa ka khyndew ka shyiap, ïa ka ri bad ka jaitbynriew bad u la pynpaw ruh ka jingsngew khia ba ka sorkar jylla ka la pyrshang ban pyntreikam ïa ka Investment Policy kaba khring ïa ki nongseng kam kiba nabar ha ka kyrteng ka roi ka par bad ong ba kane ka buh jingma haduh katta katta ïa ka jinglongtrai jong ki trai jylla ïa ka khyndew ka shyiap.
U la pynshlur bad ai mynsiem ruh ïa ki nongkitkam bad ïa ki dkhot jong ka FKJGP-South East Border Area (SEBA) Circle
ba ki dei ban trei ïa ka kam ban shakri ïa ka im lang ka sahlang bad ïa ka ri bad ka jaitbynriew.
U President jong ka FKJGP East Jaiñtia Hills District u Bah Deihok Sumer uba la banjur da kaba ong ba ka por ka ladei eh ba ki samla rangbah ba kin mih shakhmat ban ïa kit ïabah lang ïa ka khia ka shon ha ka imlang ka sahlang da kaba shim ïa ka lyngkor jingshakri ban pynpaw ïa ka jingshisha ba ngi ieid ïa ka ri bad ka jaitbynriew.
Kiba la ai jingkren ki kynthup ruh u General Secretary ka FKJGP-Shillong City, u Bah Shane Nongrum, u Waheh Shnong Lama Bah Dawan-o Rymbai bad kiwei kiwei.
Ki nongkitkam jong ka FKJGP-South Eastern Border Area Circle kiba la shah jied thymmai na ka bynta ka samoi treikam jong u snem 2025-2028 ki long u President, Bah Mathew Pajat, Vice President Bah Ampli Rupsi, General Secretary Bah Heimon Sumer, Assistant Secretary Bah Lamchwa Dong, Organising Secretary Bah Omega Sumer, Education Secretary Bah Kymmo Patwad, Displinary Secretary Bah K Rymbai, Agricultural Secretary Bah Leki Hynthong, Sports Secretary Bah Hepful Sumer, Environmental Secretary Bah Shibaitlang Suchen, Information Secretary Bah Shanbor Suchen katba ki dkhot jong ka Executive Committee ki long u Bah Ebran Suchen, Yoosuk Thamar, Pyndap Lyngdoh, Leki Dong, Suker Suchen bad Dawan Suchen.
Ka seng ka la ai sngewbha ïa ka ophis u Waheh Shnong jong ka shnong Lama da ki shuki bad ka miej kum ka dak ka jingïatreilang bad kum ka jingkyrshan bad noh syniang barit jong ka seng ïa ka shnong Lama.
