Ïatai ka jingïalang ki riew shemphang halor ka jingkylla ka suiñbneng ha ka pyrthei

Shillong, Nohprah 15: Ka jingïalang (SUSCON-XI), kaba lai sngi ka la wanrah lang ïa ki riewshemphang na ki ri ka pyrthei, ki nongwad bniah bad kiba dang shah hikai long nongsumar ban ïakren halor ki kam kiba kongsan kiba dei ban pynneh bad kumjuh halor ka jingkylla jong ka suiñbneng.
Kane ka jingïalang ka la sdang da ka jinglam khmat na u Dr. Kailash Choudhary, Conference Chair SUSCON-XI, ba ba la maitphang halor ka phang da Prof Basav Roychoudhury, Dean Research, IIM Shillong bad ka jingplie ïa ka jingïalang da u kongsan u Shyam Sundar Paliwal (Padma Shri), bad u symbud kongsan u Prabodha Acharya, Chief Sustainability Officer, JSW Group. Ki jingbatai jong ki halor kane ka phang ka la pynlong ïa baroh ba kin sdang ïa ka jingïasyllok
Ha ka sngi kaba sdang la ïoh ki jingkren maitphang na Prof. Tiina Onkila, Associate Professor, Jyväskylä University School of Business and Economics (JBSE), University of Jyväskylä, Finland ba la pyni ïa ki lynti kumno ban pynneh ïa ki rukom leh ha ki kam khaïi, bad Prof. Ugur Soytas, Professor, Economics, Climate Economics & Risk Management & Section Head at DTU – Technical University of Denmark, uba la banjur ïa ka jingdonkam ban buh hakhmat ïa ki kam hapoh ka imlang sahlang na ka bynta ka bha ka miat halor ka jingshim rai halor ka climate policy. Katba u Prof. Michael Zwicky Hauschild, Professor, Department of Environmental & Resource Engineering, Co-founder & Director of the DTU Centre for Absolute Sustainability, Technical University na Denmark, ba la pynkut ïa kane ka sngi da ka jingïasyllok ha kiba bun ki mat kiba kongsan ha kaba ïadei bad ka jingkylla ka suiñbneng.
Ha ka sngi kaba ar ka la don ka jingbteng biang bad ki jingïasyllok ha kiba bun ki phang ha kaba u Prof. Christoph Herrmann, Professor, Technische Universität Braunschweig, Germany & Director, Fraunhofer IST, u la kren ngam jylliew halor ka jingktah kaba mih na ki karkhana bad ki kam ha sor bad kumno ban shim rai halor kane.
U Prof. Kuldip Singh Sangwan, u B.K. Birla bad Shrimati Sarala Birla, Chair Professor, Mechanical Engineering, BITS Pilani, ki la sam ïa ki jingtip jong ki halor ka jingdonkam ban shna thymmai biang ïa ki tiar, ba la pynbud da u Harsh Choudhry, Co-founder & CEO ha sentra.world, ba la batai halor ka jingdonkam ban pynduna ki jingmih ki jaboh na ki karkhana bad ka bynta jong ka AI na ka bynta ban kynjoh ïa ki thong.
U Somdeb Banerjee, MD & Founder ka Dark Star Group, Ex. CEO & MD Tata Steel Minerals (Southern Africa) (Pty) Ltd u la pynshai halor ki jingkyllaiñ ha ka ïoh ka kot ha kaba ka don ka jingphiah hapdeng kiba duk bad kiba riewspah ha kaba kane ka la long lyngba ka jingeh halor ka sawdong sawkun. Ha kane ka sngi la ïoh ruh ka jingkren na u Prof. Gerard (Gerry) Farias, Dr. Bibhab Kumar Talukdar, Wildlife Biologist, Secretary General & CEO, Aaranyak, bad la pynkut ïa ka sngi baar da ka jingïakren halor ki kam ban pynwandur ïa ki jingktah jong ka jingkylla ka suiñbneng.
Ha ka sngi kaba lai ka jingïalang ka la pynleit jingmut halor ki jingdonkam ban shim rai bad ki jingshim kam bad ka jingdonkam jong ka jinglong nongïalam. U Flo Oberhofer, COO ha PyroCCS – Industrial Biochar CDR ha Global South, u la ai ka jingkren halor ka jingdonkam jong ka carbon removal technology bad ka jingdonkam jong ka jingmut jingpyrkhat na ka bynta ban ïakhun ïa ki jingeh kiba mih na ka jingkylla ka suiñbneng. La pynkut ïa ka jingïalang da ka jingkren na u Pradeep Sangwan, nongseng ka Healing Himalayas Foundation, u ba la sam ïa ki jingtip jong u halor ka jingdonkam ban pynneh pynsah ïa ka sawdong sawkun bad ka jingdonkam ban pyndon bynta ïa ki nongshong shnong ban pynneh ïa ka mei mariang.