Lamkhmat ka Balarihun Lyngkhoi ha KJCB MSW Bangalore
‘Ka jingthiah biang por ka dawai na ka bynta ka koit ka khiah’
Nongstoiñ, Nohprah 15: Ka samla Balarihun Lyngkhoi ka samla na shnong Nonglang West Khasi Hills kaba dang pule ha Bangalore, kaba dang pyntbit mynta ha Kristu Jayanti College Bangalore ïa ka kyrdan Master of Social Work, hapoh ka jingpeit jong u Dr.Jonas Richard A Head of MSW Department, ba la kyrshan lang da ka Dr.Winnie Joyce A, ka la ïoh lad ban long kum ka nongïalam ha ka prokram ba kyrpang kaba la pynlong da ka Department of Social Work jong katei ka College, ha kaba ai jinghikai ïa ki samla pule class X jong ka skul St Theresa Bacq Public School halor ka phang, ‘Ka jingthiah biang por ka dawai na ka bynta ka jingkoit jingkhiah’.
Katei ka samla ka la pynshai ba ka jingthiah biang por ka dei kaba donkam bha ym tang na ka bynta ka jingkoit jingkhiah ha ka met ka phad. Hynrei ka pynkhlaiñ ruh ïa ka bor jingkynmaw bad ka jingneh jingmut haba thmu ban leh ne ban trei ïa kano kano ka kam.
Nalor kata ka la pynsngewthuh ruh ba ka jingpynbiang ïa ka por ban thiah, ka pynkhlaiñ ym tang ïa ka jingmut jingpyrkhat. Hynrei ka pynkhlaiñ ïa ka bor met bor phad bad ka jingheh jingsan ha ka met bad ka rynïeng jong u briew.
Ha ka session kaba ar kaba la ïalam da ka samla Indira Renjini Roy, ka phang kaba la pynshai ka long halor ka jingbym thiah biang por. Katei ka samla haba pynshai halor katei ka phang ka la ong ba ka jingbym biang ka thiah ka dem ka dei kaba ktah bha ïa ka jingkoit jingkhiah ka pyntlot ïa ka jingmut jingpyrkhat bad ka ktah ruh ïa ka bor kynmaw.
Nalor kata ka jingbym biang ka por ban thiah ka pynlong ïa u briew ba un ym lah ban trei ban ktah bad wat ban bam ban dih ruh, namar ka jingkem tlot jong ki dkhot met.
U samla Paul Sebastian u la pynshai ha ki khynnah ba ka jingkilan met da kaba ring bad pyhiar mynsiem jlan man ka step, ka dei kawei ka lad ban pynïoh ïa ka met kaba koit ba khiah.
Haba pynkut ïa katei ka prokram ki khynnah pule ki la ai khublei ïa baroh ki nonghikai kiba la shimkhia bad trei shitom na ka bynta ban kyntiew ïa ki sha ki kyrdan ba kham sha jrong.