Khliehriat, Rymphang, 21: Hadien ba ka la mih jingshah thombor ha ki Polling Station ha ka shnong Wapungskur bad ha shnong Bataw, u District Magistrate jong ka East Jaiñtia Hills District u la pynjari da ka Section 163 BNSS hapoh kine ki ar tylli ki shnong ha East Jaiñtia Hills District.
Katkum ka Section 163 BNSS la mana hapoh ka shnong Wapungskur bad ha shnong Bataw ban ïalum briew palat ïa ka san ngut, la mana ban rah ïa ki tiar pynmynsaw bad ki dieng tylli, la mana ban pynwit ne pynthut ïa ka leit ka wan jong ki briew bad ym dei ruh ban leh kano kano ka kam ka ban wahrah ïa ka shongsyier hapoh shnong lane ha kino kino ki jaka paidbah ha shnong Wapungskur bad ha shnong Bataw.
Ka jingpynjari kyndon ka long hadien ba ki saw tylli ki Pollling Station, kata ar tylli ha Wapungskur bad ar tylli ha Bataw ki la shah thombor bad ka kynhun jong ki briew ki bym lah ban ithuh durkhmat ki la pynpait wat ïa ki EVM.
