Nongpoh, Kyllalyngkot 20: Kumba la bthah da ka Election Commission ka ri India ban peitngor bad ban ïaid beit ka jingjied ïa ki nongmihkhmat paidbah na ka bynta ka election 2023 hapoh ka jylla, u District Magistrate ka Ri Bhoi kumba la pynkup bor ha ka kyndon 144 CrPC u la pynjari ïa katei ka kyndon ban khang pyrshah na ka bynta ban rah pisa palat ïa ka T. 50,000 hapoh Ri Bhoi District.
Katei ka jingpynjari ïa katei ka kyndon 144 CrPC ka la khang pyrshah ruh ban pynlong ïa kano ka prokram shah thngan ki jingïaid paidbah ne kino kino ki jingïalum paidbah da ki riew shimet ne ki kynhun bad kumba la pynkup bor ruh I aka Arms Act 1959 la hukum ruh ïa baroh kito kiba don license na ka bynta ki tiar siat hapoh Ri Bhoi ki dei ban leit buh ïa ki tiar siat ha ki Police station, ki Police Outpost ne ki Beat House ha Ri Bhoi District.
Lyngba katei ka kyndon aiñ, la khang pyrshah ruh ban rah ïa ki License bad lait noh ki Pulit, k Home Guards, Forest Personnel, BSF and CPMF.
U District Magistrate ka Ri Bhoi u la pynjari ruh ïa kane ka kyndon aiñ ka dei hadien ba ka Election Commission ka Ri India na ka bynta ka General Election 2023 ha Meghalaya, ka ban long ha ka 27 tarik u Rymphang 2023 bad kumjuh ruh ba ka Model Code of Conduct ka la treikam bad ruh ba ki kyndon ba la buh da ka election commission ki la treikam hapoh kane ka jylla na ka bynta ka election 2023 hapoh ka jylla.
Kane ka kyndon aiñ ka la treikam mardor bad kan dang treikam ruh kat haduh ba la pynbna pat da kumwei, ong ka kyrwoh ba la phah da u District Magistrate ka Ri Bhoi District.
