Sdang ka 1st RBMSC Motorcross Challenge ha madan Kurkalang, shimbynta kumba 75 ngut ki rang bad thei naka thaiñ Shatei Lam Mihngi

Nongpoh, Kyllalyngkot 20: Ka jingïakop ñiah thuk thuk ba 2 sngi haki surok khohruh khohram bala tip kum ka 1st RBMSC Motorcross Challenge 2023 bala pynlong daka Ri-Bhoi Motor Sports Club kala sdang mynta ka sngi ha madan Kurkalang, Bhoirymbong bala wan ruh ban shim bynta shitrhem kumba 75 ngut ki rang bad ki thei ñiah thuk thuk na kylleng ki jaka jong ka thaiñ Shatei Lam Mihngi.
Katei ka jingïakop ka dei ruh ka sienjam ba nyngkong bala shim da ka Ri-Bhoi Mortor Sports Club da ka jingangnud ban kyntiew ïa katei ka jait jinglehkai bad khamtam ban sei ïaka sap ka phong jong ki samla kiba ju sngewtynnad ban ñiah thuk thuk haki surok khohruh khohram, bad ki jaka ba pynkhreh kyrpang ym ban pynher haki surok bah kaba lah ban wanrah ka jingmynsaw bad ka jingjia aksiden.
Ïa katei ka jingïakop la leit ban plie pyrda da u Bah Pynhun Rynghang kum u kongsan haka jingdonlang ki nongïalam ka RBMSC naduh u Bah Lance Shadap President, Bah Aiban Sylliang General Secretary, Bah Isynei Hinge Adviser, Bah Ailong Pariat bad kiwei kiwei ki riew rangbah.
Kum ban shu pynpaw ba naka liang ka RBMSC kila pynkhreh ruh ka khusnam pisa kaba 2 lakh tyngka ryngkat ka trophy haki jingïakop bapher bapher naduh ka Expert, Novice, 2 Stroke, Scooty bad kan don ruh ka jingïakop ba kyrpang naka bynta ki kynthei (Female Class) bad Ri-Bhoi Class.